Mbyllet gjysma e parë e rrugëtimit në Ligën Rajonale: Përmblidhet faza e parë e grupit për Përfaqësuesen e Kosovës U16

Me takimin ndërmjet Rumanisë dhe Kosovës është mbyllur zyrtarisht cikli i parë i ndeshjeve për Grupin C në kuadër të turneut ndërkombëtar "U16 Regional Challenge Cup" për vajza. Në sfidën e zhvilluar paraditen e së shtunës në Pallatin e Rinisë dhe Sporteve në kryeqytet, Përfaqësuesja e Rumanisë U16 triumfoi ndaj bashkmoshatareve të tyre kosovare me rezultatin 37:19. Kombëtarja rumune, e cila mbante statusin e favoriten e grupit që në letër, e konfirmoi këtë epërsi edhe në parket me një paraqitje dominuese. Kujtojmë se angazhimi i Kosovës U16 në këtë turne nisi në mënyrën më të mirë të enjten, kur regjistroi një fitore të rëndësishme kundër Bullgarisë U16 me shifrat 26:23. Ndërkaq, në ndeshjen e zhvilluar të premten, vajzat e talentuara rumune treguan forcën e tyre edhe përballë bullgareve, duke fituar thellë me rezultatin 45:15. Sipas kalendarit të garave, faza e ardhshme e ndeshjeve është parashikuar të mbahet në fund të muajit nëntor në territorin e Bullgarisë. Më pas, kalendari parasheh që Përfaqësuesja e Kosovës t'i zhvillojë edhe dy takimet e radhës ndaj kundërshtarëve të njëjtë, por kësaj radhe si mysafire në Rumani.