Zgjedhjet në Serbi: Vëzhguesit e OSBE-së vlerësojnë pjesëmarrjen e lartë, por ngrisin shqetësime për rekomandimet

Procesi zgjedhor në Serbi po ndiqet nga afër edhe nga ekipet vëzhguese të ODIHR-it. Koordinatori Special i OSBE-së për misionin e vëzhgimit afatshkurtër, Gilles Baum, ka deklaruar se shkalla e lartë e daljes në votime përbën një tregues pozitiv për shtetin serb. Në një paraqitje para mediave, Baum u shpreh se këto zgjedhje të parakohshme parlamentare mbajnë një peshë të veçantë për Serbinë, duke shtuar se interesimi i madh i qytetarëve dëshmon dëshirën e tyre për të vendosur për fatin e demokracisë dhe të ardhmes vendase. Nga ana e saj, kryetarja e misionit të Asamblerë Parlamentare të OSBE-së, njëherësh deputete italiane, Federica Honori, bëri të ditur se rreth 70 delegatë janë angazhuar në terren për të përcjellë mbarëvajtjen e procesit në të gjithë territorin. Ajo njoftoi se detajet e plota do të përpilohen gjatë ditës, ndërsa gjetjet zyrtare do të bëhen publike në hotelin Metropol nesër në orën 15:00. Hunori theksoi se udhëzimet dhe rekomandimet e ODIHR-it nuk janë zbatuar në tërësi, duke veçuar sidomos çështjet që prekin sigurinë e gazetarëve dhe keqpërdorimin e burimeve publike për nevoja elektorale. Ndërkohë, Baum bëri me dije se gjatë takimeve me dy subjekte kryesore politike, Listën e Studentëve dhe atë të Serbisë së Bashkuar, është marrë konfirmimi se ato do t'i pranojnë rezultatet zyrtare pas shpalljes së tyre. Këto zgjedhje të parakohshme parlamentare zhvillohen përgjatë ditës së sotme, me qendrat e votimit që kanë hapur dyert në orën 07:00 dhe do t'i mbyllin ato në orën 20:00. E drejta e votës u takon gjithsej 6,451,292 qytetarëve, të cilët mund të ushtrojnë këtë të drejtë në 8,392 vendvotime. Prej tyre, 29 qendra janë vendosur brenda institucioneve korrektuese, ndërsa 93 të tjera funksionojnë jashtë vendit në 37 shtete të ndryshme, ku janë regjistruar 102,147 votues. Në këtë garë për 250 ulëset e Kuvendit të Serbisë marrin pjesë 2,418 kandidatë nga 18 lista të ndryshme zgjedhore, gjysma e të cilave gëzojnë statusin e pakicave kombëtare. Për t'u bërë pjesë e parlamentit nevojitet kalimi i pragut prej tre përqind, ndërsa për listat e pakicave vlen pragu natyror. Sipas të dhënave të Komisionit Zgjedhor Qytetar (GIK), procesi i votimit u ndërpre përkohësisht në qendrën e votimit numër 3 në Kraljevë, pasi në listën e zgjedhësve mungonte një faqe e regjistruar. Votimi u rikthye normalisht sapo u sigurua lista e plotë dhe e rregulluar e votuesve për këtë njësi.