Humbje e madhe për shëndetësinë: Ndahet nga jeta anesteziologu Zekë Zeka

Komuniteti mjekësor në vend ka pësuar një humbje të rëndë pas ndarjes nga jeta të anesteziologut të njohur, Zekë Zeka. Lajmi i trishtë është bërë i ditur nga Shoqata e Anesteziologëve dhe Intensivistëve të Kosovës përmes një njoftimi zyrtar. Nëpërmjet një postimi në rrjetet sociale, kjo shoqatë profesionale i ka drejtuar mesazhet më të sinqerta të ngushëllimit familjes, të afërmve dhe gjithë kolegëve të të ndjerit. "Ndarja e tij nga jeta është një humbje e dhimbshme për familjen, miqtë dhe komunitetin tonë profesional. Profesioni ynë na lidh përmes përgjegjësisë për jetën, sfidave të përbashkëta dhe solidaritetit mes kolegëve. Me këtë ndjenjë, do ta ruajmë me respekt kujtimin e Dr. Zekë Zekës si pjesë të komunitetit tonë", thuhet ndër të tjera në reagim. Në emër të Shoqatës së Anesteziologëve dhe Intensivistëve të Kosovës, u është dërguar ngushëllimi më i sinqertë familjes Zeka dhe gjithë bashkëpunëtorëve. "U prehtë në paqe! I përjetshëm qoftë kujtimi i tij", përfundon njoftimi i shoqatës.