Dyndje në pikat kufitare, qytetarët e Luginës nisen nga Kosova për të votuar

Fluks i madh udhëtarësh dhe kolona të gjata automjetesh janë shënuar në pikën kufitare të Muçibabës, e cila lidh Gjilanin me Preshevën. Shkak i kësaj situate është bërë lëvizja e shtuar e qytetarëve që po kalojnë kufirin për të marrë pjesë në zgjedhjet parlamentare. Burimet bëjnë me dije se një numër i madh i qytetarëve nga Lugina e Preshevës, që aktualisht jetojnë në Kosovë, janë vënë në lëvizje për t'iu përgjigjur procesit zgjedhor. Ata po udhëtojnë për të mbështetur listën e përbashkët të koalicionit shqiptar, e cila mban numrin 17 në fletëvotim. Për shkak të këtij numri të lartë votuesish, ngarkesë në qarkullim është shënuar edhe në pikën tjetër kufitare te Dheu i Bardhë, ku radha e automjeteve ka kapur një gjatësi prej rreth 800 metrash. Këto lëvizje masive vijnë në kuadër të angazhimit të qytetarëve nga Lugina e Preshevës për të ushtruar të drejtën e tyre të votës në zgjedhjet që po zhvillohen në Serbi, duke sjellë si pasojë pritje dhe kolona në kufi.