Goditje ndaj nxitjes së dhunës në Itali: Arrestohet i dyshuari si 'truri' i 'Lëvizjes së 17 Tetorit'

Një aksion i rëndësishëm i Policisë së Shtetit italian në Milano ka çuar në ndalimin e 30-vjeçarit Youssef Siher, i cili konsiderohet nga organet e zbatimit të ligjit si ideatori kryesor i të ashtuquajturës “Lëvizja e 17 Tetorit”. Ky grupim shfrytëzoi platformat sociale, veçanërisht faqen në Instagram “Movimento17 ottobre”, për të orkestruar dhe nxitur veprime të dhunshme në disa nga qytetet kryesore të Italisë pas përshkallëzimit të tensioneve javën e kaluar. Lajmin e ka konfirmuar zyrtarisht Ministri i Brendshëm i Italisë, Matteo Piantedosi, i cili përmes një deklarate publike përgëzoi punën e hetuesve dhe përcolli një mesazh të prerë mbi zbatimin e ligjit. Piantedosi nëntëvizoi se “identifikimi i tij nga policia dëshmon aftësitë e jashtëzakonshme të hetuesve tanë dhe rikonfirmon një mesazh të qartë e të pakundërshtueshëm: nuk do të ketë asnjë strehë të sigurt. Shteti do të përgjigjet menjëherë kundër kujtdo që mendon se mund të organizojë sulme dhe trazira, duke besuar se mund të fshihet pas një kapuçi apo anonimitetit të rrjeteve sociale”. Për këtë zhvillim ka reaguar edhe Ministri i Mbrojtjes, Guido Crosetto, i cili vuri në dukje profilin publik dhe integrimin e të dyshuarit në mjediset akademike dhe mediatike. Crosetto u shpreh se “ai nuk ishte një i huaj, por një burrë me lidhje të forta që kishte shumë më tepër mundësi pune dhe bashkëpunime se shumica e kolegëve të tij. Nga gazetat te organet publike, ai u lidh me elitën e inteligjencës italiane. Dhe rezultatet ishin të dukshme”. Youssef Siher, me origjinë marokene i lindur dhe i rritur në provincën e Brescias, është një shtetas italian i gjeneratës së dytë me një karrierë të konsoliduar akademike dhe mediatike. Ai ka përfunduar studimet për Komunikim dhe mban një diplomë Master në Shkenca Politike nga Universiteti i Milanos, ku në vitin 2018 ishte anëtar themelues dhe kryetari i parë i Shoqatës së Studentëve Myslimanë. Sa i përket përvojës profesionale, gjatë vitit 2024 ai ka punuar si hulumtues pranë Observatorit ISPI për Lindjen e Mesme dhe Afrikën e Veriut, si dhe ka bashkëpunuar si gazetar i pavarur me mediat kombëtare, përfshirë gazetën Il Fatto Quotidiano. Aktualisht, çështja po ndiqet nga Njësia Antiterrorizëm e Prokurorisë Publike të Milanos, e koordinuar nga Prokurori Marcello Viola. Siher po hetohet për nxitje të rënduar për të kryer krim me qëllim terrorizmin përmes mjeteve të teknologjisë informative. Gjatë orëve të mëngjesit, agjentët e policisë kanë ushtruar kontrolle të imtësishme në shtëpinë e prindërve të tij në Brescia, si dhe në një banesë në Milano ku dyshohet se ai jetonte. Hetuesit kanë konfiskuar pajisjet e tij elektronike dhe po kryejnë një ekspertizë të detajuar kompjuterike për të zbërthyer rrjetin e komunikimeve dhe rolin e tij të plotë në organizimin e protestave të dhunshme.