Valë pakënaqësish në Evropë: Përleshje me autoritetet, gaz lotsjellës dhe qindra të arrestuar gjatë protestave

Kriza ekonomike, rritja e kostos së jetesës, rënia e fuqisë blerëse, sfidat në sistemin arsimor dhe zhvillimet e ndryshme politike e sociale kanë nxitur mijëra qytetarë që të zbresin në sheshe në disa shtete evropiane. Vala e protestave ka përfshirë Francën, Belgjikën, Italinë, Shqipërinë, Spanjën dhe Turqinë, ndërkohë që në qytete të caktuara situata ka eskaluar në përleshje të drejtpërdrejta me forcat e rendit, duke sjellë arrestime masive dhe ndërhyrje me gaz lotsjellës. Në Francë, autoritetet kanë raportuar për afër 1,000 persona të ndaluar gjatë zhvillimit të tubimeve, të cilat u shoqëruan me incidente në metropolin francez, si dhe në Marsejë, Nantë, Grenoble dhe Tuluzë. Ministri i Brendshëm francez, Laurent Nunez, konfirmoi se shifra e të ndaluarve kishte arritur në rreth 1,000 veta deri në orën 19:30, krahasuar me 135 arrestime që ishtenë regjistruar deri në orën 13:00 të pasditës. “Për krahasim, në të njëjtën kohë gjatë protestave të 17 tetorit, pati 385 arrestime”, theksoi Nunez, referuar të dhënave të transmetuara nga televizioni BFM TV. Të dhënat zyrtare nga dikasteri i Brendshëm treguan se në mbarë vendin dolën rreth 410,000 protestues, ndërsa sindikata CGT e llogariti numrin e pjesëmarrësve në rreth 800,000. Në Paris, grupe protestuesish thyen xhamat e një salloni automjetesh në zonën e Porte de Vincennes, ndërsa Prefektura e Policisë njoftoi se mbi 500 persona ndërmorën sulme ndaj efektivëve në Cours de Vincennes. Incidentet nuk munguan as në qytete të tjera; në Nantë u shënua grabitje dhe dëmtim i një dyqani, duke çuar në arrestimin e gjashtë personave, kurse në Grenoble një turmë prej afro 400 individësh të maskuar sulmoi policinë me mjete piroteknike. Në Tuluzë, një qytetar pësoi lëndime të rënda në duar në përfundim të manifestimit. Sipas ministrit Nunez, pavarësisht se kolonat e qytetarëve ishin kryesisht paqësore, fraksione të caktuara shfrytëzuan situatën për të nxitur trazira dhe për të kryer akte të paligjshme. Kërkesat e qytetarëve në këto tubime përfshinin mbrojtjen e lirive civile, kushte më të mira jetese dhe financime më të fuqishme për shërbimet publike, ku krahas studentëve dhe sindikalistëve morën pjesë edhe simpatizantë të lëvizjes “Jelekët e Verdhë”. Ndërkohë, në kryeqytetin belg, Bruksel, forcat e policisë përdorën gaz lotsjellës dhe sprej me piper për të shpërndarë turmën e demonstruesve që kundërshtonin reformat në arsim, shtrenjtimin e tarifave të studimit dhe dhunën e pretenduar policore. Tensionet u përshkallëzuan pasi një grup protestuesish provokoi efektivët dhe çau kordonin e sigurisë, siç raportoi televizioni flamand VRT. Autoritetet belge vunë në gatishmëri edhe një automjet me ujë sub-presion dhe u bënë thirrje protestuesve që të shpërndaheshin drejt sektorit jugor të qytetit. Te sheshi Albertina u mblodhën qindra qytetarë, ndërsa policia ushtroi kontrolle dhe sekuestroi mjete që konsideroheshin të rrezikshme për shkaktimin e dëmeve materiale. Të pranishmit hodhën thirrje kundër fashizmit dhe asaj që e cilësuan si shndërrim i vendit në shtet policor, në një organizim të ndërmarrë nga disa bashkësi dhe shoqata studentore, pas një proteste të ngjashme të zhvilluar vetëm një javë më parë. Në Itali, qytetarët dolën gjithashtu në rrugët e disa qyteteve për të protestuar kundër politikave qeveritare, shtrenjtimit të jetesës dhe angazhimit të vendit në konflikte ndërkombëtare. Në Milano, qindra demonstrues u mblodhën te Piazza Cairoli duke mbajtur parulla kundër kabinetit të udhëhequr nga kryeministrja Giorgia Meloni dhe duke kërkuar largimin e saj, ndërsa në Torino protestuesit dogjën një portret simbolik të saj te Piazza Castello. Në Romë, marshimi u zhvillua nën thirrjen “Italia jashtë lu…”.