Përballja e madhe në “Elbasan Arena”, Ilir Daja: Na pret një ndeshje e fortë ndaj kampionëve

Dinamo është gati të zbresë sërish në fushë nesër, për të disputuar sfidën e vlefshme për javën e 8-të të kampionatit kombëtar. Kryeqytetasit do të presin në “Elbasan Arena” skuadrën e Egnatias, mbajtësen e trofeut të kampionit në fuqi, në një duel direkt mes dy ekipeve që synojnë kreun e renditjes. Në prag të këtij takimi delikat, trajner i Dinamos, Ilir Daja, ka dhënë një prononcim për kanalet zyrtare të klubit, ku ka analizuar forcën e kundërshtarit dhe qasjen që skuadra e tij duhet të ketë për të dalë me rezultat pozitiv. Kreu i stafit teknik u shpreh se shtatë javët e para kanë treguar qartë se nuk ekzistojnë sfida të lehta, ndërsa thuri elozhe për Egnatian për ecurinë e shkëlqyer si në kompeticionet vendase, ashtu edhe në skenën ndërkombëtare. “Duke parë ecurinë e skuadrave në kampionat dhe rezultatet e shtatë javëve të zhvilluara deri më tani, kemi kuptuar se nuk ka ndeshje të lehta. Aq më tepër kur përballë kemi kampionen në fuqi të Shqipërisë, një skuadër që po bën mirë edhe në Europë. Na pret një përballje me një rival të drejtpërdrejtë për pjesën e sipërme të tabelës së klasifikimit. Egnatia vjen në një moment të mirë psikologjik, pas rezultateve pozitive dhe paraqitjeve të rëndësishme në Conference League. Megjithatë, nesër, ashtu si në çdo ndeshje tjetër, ne do të zbresim në fushën e lojës me objektivin për të marrë maksimumin”, u shpreh Daja. Më tej, trajneri i njohur u ndal te sakrifica dhe angazhimi që kërkohet nga grupi i tij për t'ia dalë me sukses në këtë provë të vështirë. “Duhet të djersisim shumë dhe të sakrifikojmë shumë për të shkuar te rezultati që kërkojmë. Ne e vlerësojmë maksimalisht çdo kundërshtar dhe lojtarët që do të zbresin në fushën e lojës duhet të japin gjithçka nga vetja. Kemi një kontingjent të mirë futbollistësh dhe rikthimi gradual i një pjese të lojtarëve të dëmtuar na jep më shumë alternativa dhe mundësi për të ndërhyrë në çdo moment të ndeshjes”, përfundoi trajneri i Dinamos.