Përplasjet në Tiranë, Adriatik Lapaj fajëson drejtpërdrejt kryeministrin Edi Rama për dhunën ndaj protestuesve

Kreu i lëvizjes “Shqipëria Bëhet”, Adriatik Lapaj, ka reaguar ashpër pas incidenteve të dhunës të regjistruara gjatë protestës së zhvilluar këtë të shtunë në kryeqytet, duke i drejtuar akuza të rënda strukturave policore për përdorim të pajustifikuar të forcës ndaj qytetarëve. Nëpërmjet një postimi në rrjetet sociale, ku ka shoqëruar edhe pamje filmike nga vendi i ngjarjes, Lapaj ka ngritur pretendimin se efektivët e rendit kanë goditur në zonën e kokës një protestues, i cili sipas tij kishte humbur ndjenjat dhe ishte i pambrojtur. Sipas drejtuesit të “Shqipëria Bëhet”, përgjegjësia kryesore për këtë situatë dhe për trajtimin e dhunshëm të qytetarëve i takon kreut të Qeverisë, Edi Rama, të cilin e ka vënë në shënjestër të akuzave të tij. “Edi Rama, je përgjegjës në vetë të parë për dhunën barbare mbi qytetarët!”, ka shkruar Lapaj në reagimin e tij publik. Më tej, ai ka lëshuar akuza edhe ndaj vetë efektivëve të pranishëm në terren, duke pretenduar se ata janë individë të ardhur nga qyteti i Fierit dhe duke i lidhur ata me ministren Belinda Balluku. “Shikoni se si bandat e Belinda Ballukut të sjella nga Fieri janë veshur me uniformë dhe gjuajnë në kokë me kambale qytetarin i cili kishte rënë pa ndjenja”, deklaron ndër të tjera ai. Në fund të deklaratës së tij, Lapaj ka dërguar një mesazh të qartë se aktet e dhunës nuk do të mund t'i zmbrapsin apo t'i nënshtrojnë qytetarët në kauzën e tyre. “Nuk do na nënshtroni dot! Me dhunë nuk do ia dilni dot”, përfundon reagimi i kreut të “Shqipëria Bëhet”. Këto akuza dhe pretendime vijnë në një moment kur tensionet dhe përplasjet mes pjesëmarrësve në protestë dhe forcave të sigurisë në Tiranë kanë sjellë një valë reagimesh të gjera nga ana e personaliteteve politike dhe aktorëve të shoqërisë civile.