“Më thanë pi paracetamol” – Gazetari Klevin Muka rrëfen orët e tmerrit pas dhunës në protestë

Gazetari i njohur i News24, Klevin Muka, ka ndarë përvojën e tij të dhimbshme nga terreni gjatë protestës së 24 tetorit në kryeqytet, duke zbuluar detaje dramatike rreth pasojave që pësoi pasi u sulmua me sprej piperi gjatë detyrës. I ftuar në studio, Muka tregoi se fillimisht nuk i dha rëndësi ngjarjes, duke pandehur se djegiet dhe skuqjet do të zhdukeshin shpejt. Megjithatë, situata mori një kthesë shqetësuese rreth 60 minuta pas incidentit, kur trupi i tij nisi të reagojë me dhimbje të padurueshme. Sipas gazetarit, ndonëse puna e përditshme në sheshe i kishte bërë ata imunë ndaj gazit lotsjellës, këtë radhë agjentët kimikë të sprejit me piper kishin shkaktuar dëmtime shumë më të rënda fizike që nuk po qetësoheshin me kalimin e kohës. Pasi u kthye në banesë dhe konstatoi shkallën e djegieve, ai u detyrua të kërkonte ndihmë mjekësore. Gjatë këtij momenti kritik, ai mori një përgjigje zhgënjyese nga shërbimi i urgjencës, ku iu sugjerua thjesht përdorimi i një paracetamoli, gjë që e shtyu të merrte masa vetjake për mjekimin e plagëve. “Jam mirë besoj se ka qenë një reaksion, pas një orë kam ndjerë gjithë dhimbjen dhe djegien e trupit. Ishte e vështirë për ta mbajtur. Gjatë gjithë këtyre ditëve kemi pasur gaz lotsjellës, në njëfarë mënyrë nuk na bënte përshtypje as gazi lotsjellës. Një shqetësim i momentit që mund të kalonte kështu e mendova, por nuk po kalonte dhe situata po përshkallëzohej dhe nuk po qëndroja dot më. Kur shkova në shtëpi dhe pashë që kisha pësuar djegie, mora masat nga komunikimi me mjekët, dhe kam bërë mjekimin. Dëmtimi im besoj një javë do zgjasë do ikë, kam telefonuar ambulancë në një moment më thanë nuk kemi çfarë t’i bëjmë, pi një paracetamol pastaj u dorëzova dhe mora vetë situatën në dorë”, u shpreh ai gjatë rrëfimit të tij.