Tensionet në Tiranë, Policia e Shtetit jep detajet e para: Efektivët u vunë në shënjestër të akteve të dhunshme

Pas incidenteve të shënuara gjatë tubimit të sotëm në kryeqytet, Policia e Shtetit ka dalë me një nomim zyrtar për të sqaruar situatën në terren. Sipas njoftimit zyrtar, forcat e rendit janë gjendur përballë sulmeve të njëpasnjëshme dhe akteve të dhunës, të cilat përbëjnë një rrezik real për jetën dhe integritetin fizik të vetë efektivëve. Institucioni ligjzbatues u ka bërë thirrje të qartë qytetarëve që t'i shmangin perimetret ku po regjistrohen përplasje dhe të mos bëhen pjesë e sjelljeve që cënojnë qetësinë publike. “Gjatë protestës së ditës së sotme, punonjësit e Policisë së Shtetit janë përballur me akte të vazhdueshme dhune, të cilat rrezikojnë drejtpërdrejt jetën dhe shëndetin e tyre, si dhe sigurinë e qytetarëve. Policia e Shtetit u bën thirrje të gjithë pjesëmarrësve në protestë të distancohen nga personat e maskuar dhe të dhunshëm, të cilët sulmojnë punonjësit e Policisë dhe institucionet, si dhe dëmtojnë pronën publike e private. U bëjmë thirrje qytetarëve të shmangin zonat ku po ushtrohen akte dhune dhe të mos bëhen pjesë e veprimeve që cenojnë rendin dhe sigurinë publike. E drejta për të protestuar në mënyrë paqësore është e garantuar me ligj. Dhuna, sulmet ndaj punonjësve të Policisë dhe dëmtimi i pronës publike e private janë të papranueshme dhe ndëshkohen me ligj. Çdo veprim i dhunshëm që rrezikon jetën e punonjësve të Policisë dhe të qytetarëve do të trajtohet në përputhje me ligjin. Policia e Shtetit vijon të jetë në krye të detyrës për garantimin e rendit dhe sigurisë publike, në zbatim të ligjit dhe në shërbim të qytetarëve“, thuhet në reagimin e tyre.