Elseid Hysaj kthehet në Itali, mbrojtësi i Kombëtares stërvitet me ish-klubin

Mbrojtësi i Kombëtares shqiptare, Elseid Hysaj, është rikthyer përkohësisht në Itali, ku ka nisur stërvitjet për të ruajtur formën e tij fizike në ambientet e Empolit. Futbollisti po stërvitet aktualisht me skuadrën e të rinjve të Empolit që garon në kampionatin “Primavera”, në kompleksin stërvitor në Monteboro. Klubi italian ka vendosur t'i hapë dyert për lojtarin, duke shfrytëzuar edhe lidhjen e kaluar që Hysaj ka pasur me këtë fanellë. Në muajt e fundit, pas largimit si lojtar i lirë gjatë merkatos së verës, 31-vjeçari ka ndjekur një rrugë të ngjashme edhe në Shqipëri, ku u stërvit përkohësisht me skuadrën e Vllaznisë. Megjithëse vazhdon të mbetet pa skuadër prej disa muajsh, ai mbetet një figurë kyçe dhe lider i padiskutueshëm në radhët e Kombëtares kuqezi. Ndërkohë, sa i përket së ardhmes së tij, mbrojtësi i djathtë është ende në kërkim të projektit të duhur sportiv. Deri më tani, interesim për shërbimet e tij kanë shfaqur klube nga vende të ndryshme si Italia, Spanja dhe Rusia, por oferta e përshtatshme ende nuk është zyrtarizuar.