Momente ankthi në derbin e Shkodrës: Kapiteni përfundon në spital, vjen reagimi i klubit

Derbi shkodran i Kategorisë së Dytë mes Vllaznisë B dhe Shirokës, i vlefshëm për javën e pestë dhe i mbyllur me rezultatin 4-2, është shoqëruar me momente paniku për shkak të dëmtimit të rëndë të kapitenit të Shirokës, Erjon Vucaj. Në minutën e 30-të të takimit, pas një përplasjeje të fortë me mbrojtësin kundërshtar gjatë një dyluftimi në fushë, futbollisti u detyrua të linte fushën e lojës dhe u dërgua me urgjencë drejt spitalit rajonal për të marrë trajtimin e nevojshëm mjekësor. Lidhur me këtë ngjarje, drejtuesit e klubit të Shirokës kanë lëshuar një deklaratë zyrtare për të qetësuar opinionin sportiv dhe mbështetësit e skuadrës, duke konfirmuar se situata shëndetësore e lojtarit është nën kontroll. "I urojmë shërim të shpejtë kapitenit tonë, Erjon Vucaj! Pas dëmtimit të pësuar nga ndërhyrja e mbrojtësit të Vllaznisë, ai u transportua menjëherë në spital," thuhet në nomimin e klubit. Në vijim të reagimit, klubi ka theksuar se rreziku ka kaluar dhe lojtari gëzon shëndet të plotë. "Fatmirësisht, gjendja e tij shëndetësore është e mirë! I urojmë kapitenit tonë rikuperim sa më të shpejtë dhe e presim sa më parë në fushën e blertë, aty ku i takon," shtohet në deklaratën e Shirokës.