Tensionet në Francë: Forcat e rendit ndërhyjnë me gaz lotsjellës dhe topa uji në disa qytete

Vala e protestave që ka përfshirë Francën ka çuar në ndërhyrjen e ashpër të policisë në disa qytete, ku janë përdorur gaz lotsjellës dhe topa uji për të shpërndarë turmat. Sipas autoriteteve, deri më tani gjashtë persona kanë rënë në pranga pas incidenteve të regjistruara me vandalizëm dhe grabitje në qytetin e Nantes, në perëndim të vendit. Në prag të këtyre zhvillimeve, Prefektura e rajonit Pays de la Loire dhe e departamentit Loire-Atlantique kishte lëshuar një paralajmërim urgjent, duke u kërkuar banorëve të qarkullonin larg qendrës së qytetit për shkak të tubimeve që nuk kishin marrë lejen zyrtare. Trazirat janë shtrirë në mbarë territorin francez. Në Lion, efektivët e policisë përdorën gaz lotsjellës për të shpërndarë protestuesit, ndërsa skena të ngjashme janë regjistruar edhe në Marsejë. Njëri nga pjesëmarrësit në protestën e Lionit deklaroi se rreth 150 veta, kryesisht maturantë dhe studentë, ishin mbledhur në shesh dhe se ndërhyrja me gaz lotsjellës kishte ndodhur pothuajse menjëherë, duke e bërë pamjen në rrugë pothuajse të padukshme për shkak të tymit. Mediat vendase bëjnë me dije se forcat e sigurisë kanë vënë në përdorim edhe topa uji, ndërkohë që ndërhyrje me gaz lotsjellës janë shënuar gjithashtu në qytetin e Nicës. Veprime të ngjashme të policisë janë raportuar edhe në Clermont-Ferrand, ku u ndërhodh ndaj një grupi prej disa qindra protestuesish. Në Bordo, situata ka eskaluar me përleshje, ku efektivët bëjnë të ditur se protestuesit kanë gjuajtur me sende të forta drejt policisë dhe kanë ngritur barrikada në sheshin "Place de la Bourse", duke nxitur autoritetet t'u bëjnë thirrje qytetarëve që t'i shmangin këto hapësira. Pamjet e shpërndara nga prefektura lokale shfaqin persona me veshje të errëta dhe fytyra të mbuluara, të cilët shkulin dërrasa nga një ndërtesë për t'i përdorur në ngritjen e bllokadave rrugore.