Trazirat në Tiranë: RENEA rrethon Kryeministrinë, protestuesit shpërndahen në grupe dhe shënohen të lënduar

Dinamika e protestës në bulevardin “Dëshmorët e Kombit” në Tiranë ka sjellë zhvillime të reja sa i përket dislokimit të forcave të sigurisë dhe lëvizjes së turmës në terren. Efektivët e repartit special RENEA janë pozicionuar në perimetrin e Kryeministrisë për të siguruar mbrojtjen e institucionit, ndërkohë që Policia e Shtetit ka përshtatur skemën e saj të vendosjes. Një pjesë e trupave është zhvendosur nga kryeministria drejt Urës së Lanës, kurse efektivë të tjerë janë vendosur në hyrje të bulevardit, afër Ministrisë së Brendshme. Në bulevard numri i protestuesve është zvogëluar ndjeshëm, pasi shumica e tyre është larguar. Turma është fragmentuar në disa drejtime kryesore të kryeqytetit, duke u ndarë në grupe më të vogla që janë drejtuar për te Sheshi Skënderbej, rruga “Myslym Shyri”, Parku Rinia dhe rruga e Elbasanit. Gjatë ditës, situata ka shënuar përshkallëzim për shkak të akteve të dhunës nga disa protestues në pika kyçe të qytetit, përfshirë hedhjen e bombave molotov dhe vënien e zjarrit tek dera e Ministrisë së Mjedisit. Po ashtu, janë djegur koshat e mbeturinave pranë Urës së Bllokut dhe pranë Drejtorisë së Policisë së Tiranës, ndërsa incidente të ngjashme janë regjistruar edhe në rrugën “Myslym Shyri”. Për të vënë nën kontroll situatën dhe për të shpërndarë turmën, forcat e rendit janë kundërpërgjigjur duke përdorur gaz lotsjellës dhe ujë me presion. Ministria e Shëndetësisë dhe Mirëqenies Sociale ka bërë publike të dhënat paraprake për personat që kanë kërkuar ndihmë mjekësore deri në orën 16:30. Në Qendrën Spitalore Universitare “Nënë Tereza” (QSUT) janë trajtuar një deputet, një gazetare dhe katër protestues, të cilët pasi kanë marrë ndihmën e parë janë larguar nga spitali. Në Spitalin Universitar të Traumës (SUT) kanë marrë ndihmë mjekësore një efektiv policie dhe një përfaqësues i medias. Autoritetet shëndetësore kanë konfirmuar zyrtarisht se gjendja shëndetësore për të gjithë të lënduarit në të dy spitalet është e qëndrueshme.