Tronditje në Vorë, Julian Ahmataj zbulon çelësin e fitores ndaj Partizanit

Pas triumfit të rëndësishëm me rezultatin 0-2 të Skënderbeut kundër Partizanit në sfidën e zhvilluar në Vorë, trajneri Julian Ahmataj ka analizuar paraqitjen e skuadrës së tij, duke vënë theksin te rëndësia jetike e tri pikëve në këtë fazë të kampionatit. “Na gëzojnë vetëm pikët, në këtë moment na duheshin fitoret. E nisëm jo mirë me rezultatet, loja nuk na ka munguar. Ka vend për përmirësuar, për ta dërguar skuadrën në atë nivel që duam”, u shpreh fillimisht tekniku i korçarëve, duke folur për ecurinë e deritanishme. Duke analizuar kundërshtarin, Ahmataj pranoi forcën e të kuqve, veçanërisht në repartin e sulmit: “Partizani është skuadër shumë e fortë. Ka lojtarë shumë të mirë, sidomos faza ofensive. Duhet të merreshin masa, në fillim patëm vështirësi në fillim po më pas çdo gjë u stabilizua”. Sipas trajnerit, skuadra e tij ka vuajtur mungesën e finalizimit në minutat e para, ndërsa u ndal edhe te mungesa e Nasr: “Ne kemi pasur problem me golat në fillim e ndeshjes. Ashtu erdhi ndeshja, mund të shënonim më përpara. Nasr? Ne e kishim në avantazh ndeshjen. Ai do jetë pjesë në vazhdim, por nuk kishim pse e rrezikonim në këtë ndeshje dhe me këtë terren plastik. Mendoj do vlejë më shumë në ndeshjet e ardhshme”. Në fund, kreu i stafit teknik shprehu besimin e plotë te grupi i lojtarëve, duke kërkuar megjithatë përqendrim maksimal dhe maturi për sfidat e ardhshme: “Ne kemi punuar shumë gjatë kësaj periudhe. Në futboll gjërat mund të prishen në sekonda. Lojtarët japin maksimumin në fushën e lojës. Ne themi me bindje që këto lojtarë janë të nivelit të lartë, me cilësi. Ne kemi brum. Gradualisht do shkojmë te maksimumi ynë, por duhet të jemi me këmbë në tokë”.