Triumf historik në Solden: Paula Moltzan mposht për një qindtëse skiatoren kuqezi

Skiatorja amerikane Paula Moltzan, në moshën 32-vjeçare, ka shkruar historinë duke regjistruar fitoren e saj të parë në Kupën e Botës në skijim. Ajo ka rrëmbyer vendin e parë në garën e sllallomit të madh, e cila u zhvillua në qendrën e njohur austriake, në Solden. Moltzan triumfou me një kohë totale prej 2:14.82 minuta, duke lënë pas vetes për vetëm një të qindtë të sekondës skiatoren që garon për ngjyrat e Shqipërisë, Lara Colturi. Në shkallën e tretë të podiumit u ngjit Emma Aicher, e cila zhvilloi gjithashtu një paraqitje fantastike, duke regjistruar një diferencë prej 52 qindtash nga vendi i parë. Për Lara Culturin, ky rezultat përfaqëson një arritje të jashtëzakonshme, pasi ky është podiumi i saj i parë në karrierë në disiplinën e sllallomit të madh në kuadër të Kupës së Botës. Gjatë lëshimit të dytë, kushtet atmosferike dhe të pistës pësuan një përkeqësim të ndjeshëm, fakt ky që solli ndryshime rrënjësore në renditjen përfundimtare për garueset që kish dominuar në pjesën e parë të garës. Mikaela Shiffrin, e cila synonte triumfin e saj të parë në këtë disiplinë pas një pauze prej gati tri vitesh, nuk arriti të ruajë kreun pas lëshimit të parë dhe përfundoi e shtata në tabelën e përgjithshme. Ndërkohë, Sara Hector, e cila e mbylli lëshimin e parë në pozicionin e dytë, u rendit e katërta, kurse Camille Rast nga vendi i tretë ra në pozitën e gjashtë. Renditja zyrtare top-dhjetë e garës në Solden: 1. Paula Moltzan (SHBA) 2:14.82 2. Lara Colturi (Shqipëria) +0.01 3. Emma Aicher (Gjermania) +0.52 4. Sara Hector (Suedia) +0.63 5. Asja Zenere (Italia) +0.72 6. Camille Rast (Zvicra) +0.81 7. Mikaela Shiffrin (SHBA) +0.83 8. Alice Robinson (Zelanda e Re) +1.01 9. Maryna Gasienica Daniel (Polonia) +1.12 10. Franziska Gritsch (Austria) +1.15