Kriza energjetike në Kosovë, AAK paralajmëron interpelancë në Kuvend për importin milionësh

Kryetari i Aleancës, Ardian Gjini, ka dalë në një konferencë për media për të ngritur alarmin mbi situatën e rënduar energjetike në vend, duke vënë në pah rritjen e ndjeshme të importit të rrymës. Gjini u shpreh se Kosova po përballet sërish me një kolaps energjetik pas shumë vitesh, të shoqëruar nga një import masiv dhe me kosto të larta, të cilat përfundimisht rëndojnë buxhetin e qytetarëve. Sipas tij, shifra e importit të energjisë elektrike vetëm gjatë muajit shtator ka kapur vlerën e rreth 27 milionë eurove. Në dritën e këtyre zhvillimeve, kreu i AAK-së njoftoi se subjekti i tij politik do të ndërmarrë hapa konkretë institucionalë, duke kërkuar mbajtjen e një interpelance për të trajtuar dhe adresuar rrënjësisht krizën aktuale të energjisë elektrike.