Inovacioni dhe siguria publike, Ismail Dibrani përfaqëson Kosovën në samitin ndërkombëtar në Florida

Drejtori i Përgjithshëm i Shërbimit Korrektues të Kosovës, Ismail Dibrani, po zhvillon një vizitë zyrtare në Shtetet e Bashkuara të Amerikës, ku po merr pjesë në punimet e Samitit Global të Inovacionit dhe Sigurisë. Ngjarja e rëndësishme po zhvillohet më 22 dhe 23 tetor 2026, në Palm Beach County të Floridës. Ky takim i nivelit të lartë është organizuar nga Zyra e Sherifit të Palm Beach County, në bashkëpunim të ngushtë me kompanien 'Axon'. Veprimtaria ka bashkuar figura kryesore dhe zyrtarë të agjencive të zbatimit të ligjit nga rajone të ndryshme të globit, përfshirë Evropën, Amerikën e Veriut, Azinë, Lindjen e Mesme dhe Amerikën Qendrore. Agjenda e samitit fokusohet tek e ardhmja e sigurisë publike, integrimi i inteligjencës artificiale, risitë teknologjike në funksion të sigurisë, garantimi i mbrojtjes për efektivët, si dhe adresimi i sfidave aktuale me të cilat përballen strukturat e sigurisë në një realitet gjithnjë e më sfidues. Përfaqësimi i Kosovës në këtë ngjarje globale vlerësohet si një mundësi e shkëlqyer për të ndarë përvojat, për të ndërtuar ura të reja bashkëpunimi dhe për t'u njohur nga afër me zgjidhjet e avancuara teknologjike që mund të ndihmojnë në ngritjen e performancës dhe efikasitetit institucional. Në kuadër të angazhimeve të tij, Shërbimi Korrektues i Kosovës mbetet i përkushtuar në ngritjen e standardeve profesionale, modernizimin përmes inovacionit dhe zgjerimin e partneriteteve ndërkombëtare. Pjesëmarrja në ngjarje të tilla shërben si hap kyç për adoptimin e praktikave më të mira evropiane dhe ndërkombëtare drejt një sistemi korrektues sa më modern dhe të sigurt. Prania e kryesuesit të Shërbimit Korrektues në këtë samit dëshmon angazhimin e vazhdueshëm për të qenë pjesë e nismave globale që synojnë adresimin e sfidave të përbashkëta, me qëllim final ndërtimin e institucioneve më të forta dhe profesionale në shërbim të rendit, ligjit dhe sigurisë publike.