“Në Spanjë vetëm në plazh” – Përgjigjja epike e Artetës ndaj dëshirës së David Rayas për të luajtur në La Liga

Strategu i Arsenalit, Mikel Arteta, ka zgjedhur humorin për t'iu kundërvënë deklaratave të fundit të portierit David Raya, i cili shprehu hapur ambicjen për të luajtur në kampionatin spanjoll në një të ardhme. Pavarësisht fjalëve të guardametanit, tekniku i londinezëve ka bërë të qartë se nuk ka ndërmend të heqë dorë nga shtylla kryesore e portës së tij, duke konfirmuar se e ardhmja e afërt e spanjollit mbetet e ngulitur në kryeqytetin anglez. Diskutimet rreth fatit të tij sportiv nisën pas një interviste që David Raya dha për gazetën spanjolle “Marca”, ku ai pranoi haptazi dëshirën për ta shijuar një ditë futbollin në La Liga. Edhe pse po kalon një periudhë suksesi të jashtëzakonshëm në Londër, gardiani i kombëtares spanjolle nuk e fsheh dëshirën që në një moment të karrierës të paraqitet në vendlindje. Megjithatë, reagimi i Mikel Artetës ka qenë i menjëhershëm, duke e mbyllur derën për çdo largim të parakohshëm nga Arsenali. I lindur në rajonin e Katalonjës, David Raya e ka ndërtuar të gjithë rrugëtimin e tij si profesionist unikisht në futbollin e Mbretërisë së Bashkuar. Ai u transferua në Angli në moshën 16-vjeçare për t'iu bashkuar akademisë së Blackburn Rovers. Pas formimit në ekipet e të rinjve, Raya regjistroi 98 paraqitje zyrtare me skuadrën e parë të Blackburnit, ndërsa pati edhe një periudhë huazimi te Southporti. Karriera e tij mori një tjetër kthesë në vitin 2019 kur u transferua te Brentfordi, ku paraqitjet e tij mbresëlënëse rritën interesimin e gjigantëve të Premier League. Më pas, Arsenali arriti të siguronte shërbimet e tij përmes një marrëveshjeje me vlerë rreth 27 milionë funte. Raya fitoi shpejt besimin e plotë të Mikel Artetës, duke u shndërruar në zgjedhjen e parë në portë dhe duke fituar garën e fortë ndaj Aaron Ramsdale. Pavarësisht këtij statusi, në bashkëbisedimin me “Marca”, ai pranoi se të luajturit në Spanjë mbetet një synim. “Po, do të më pëlqente shumë. Do të dëshiroja ta provoja La Ligën”, u shpreh Raya. Ai shtoi se ndonëse ndihet i mrekullueshëm te Arsenali, dëshira për të provuar veten në kampionatin e vendit të tij mbetet e pranishme, duke e cilësuar La Ligën si një ambient tejet konkurrues dhe një sfidë që do t'i pëlqente ta përjetonte. Deklaratat e portierit nuk kaluan pa u vënë re nga stafi teknik, me Mikel Artetën që iu përgjigj spekulimeve me batutë, duke theksuar se spanjolli nuk ka ndërmend të lëvizë nga Londra. “Mendoj se Davidi duhet të luajë në Spanjë në një moment, në plazh me miqtë e tij gjatë verës. Por për vitet e ardhshme duhet të luajë këtu, për Arsenalin”, deklaroi trajneri. Përmes kësaj përgjigjeje, shefi i stolin londinez dërgoi një sinjal të qartë për rëndësinë e pazëvendësueshme që Raya ka në skemat e tij, duke dashur t'i japë fund çdo lloj paqartësie rreth së ardhmes së tij në klub. Pavarësisht dëshirës personale të lojtarit për të luajtur në Spanjë një ditë, Arsenali gëzon një pozicion tejet të sigurt falë kontratës. Portieri është i lidhur me klubin londinez përmes një marrëveshjeje që skadon në vitin 2028, çka do të thotë se çdo lëvizje e mundshme në të ardhmen do të varet tërësisht nga akordi me drejtuesit e Arsenalit. Raya ka qenë një ndër figurat kyçe të skuadrës që, sipas raportimeve, arriti të kurorëzohej me sukses në Premier League pas një pritjeje prej 22 vitesh.