Tubimi kombëtar i opozitës, masa të rrepta sigurie dhe kontrolle intensive në “Rrugën e Arbrit”

Për shkak të protestës kombëtare të lajmëruar nga opozita, Policia e Shtetit ka ndërmarrë një sërë masash paraprake, duke shtuar prezencën dhe kontrollet në akse kyçe. Strukturat e Drejtorisë Vendore të Policisë së Dibrës janë pozicionuar pranë hyrjes së tunelit të Murrizit. Efektivët po monitorojnë nga afër dhe po ushtrojnë kontrolle të detajuara ndaj mjeteve që transportojnë qytetarë dhe mbështetës të opozitës nga ky qark drejt kryeqytetit. Gjatë këtij operacioni, uniformat blu kanë ndaluar disa automjete, kryesisht bazuar në dyshime operative se mund të ketë individë me precedentë apo elementë problematikë që synojnë të infiltrohen në tubimin e organizuar në Tiranë. Megjithatë, sipas autoriteteve, situata paraqitet e qetë dhe deri në këto momente nuk është konstatuar asnjë rast i dyshimtë apo persona që përbëjnë rrezik për rendin publik gjatë lëvizjes drejt Tiranës. Për të marrë pjesë në këtë protestë në shesh, qytetarët dhe mbështetësit nga qarku i Dibrës kanë preferuar kryesisht përdorimin e automjeteve të tyre private për udhëtimin drejt kryeqytetit.