Operacion masiv në Londër: Goditet rrjeti kriminal shqiptar, 10 të prangosur dhe sekuestrohen armë e drogë

Një hetim dyvjeçar i ndërmarrë nga autoritetet policore britanike ka rezultuar në çmontimin e një organizate të dyshuar kriminale me origjinë shqiptare, e cila dyshohet se merrej me trafikim droge, tregti të mallrave të kundërligjshme dhe shfrytëzimin e një shtëpie publike në zonën e Hounslow-t. Operacioni i gjerë u finalizua me arrestimin e 10 personave, ndërkohë që janë sekuestruar sasi lëndësh narkotike, armë të ndryshme dhe pasuri me vlerë të konsiderueshme, në kuadër të goditjes së këtij grupi që shtrinte aktivitetin në Londrën Perëndimore. Sipas të dhënave hetimore, operacioni nisi pas sinjalizimeve të mbledhura nga efektivët lokalë në rrugë, duke vënë në lëvizje ekipe të specializuara që për rreth dy vjet mblodhën prova dhe gjurmuan të dyshuarit e përfshirë në importimin dhe shpërndarjen e drogave të kategorisë A, produkteve të falsifikuara dhe administrimin e një shtëpie publike në Hounslow. Ndërhyrja u krye në orët e para të mëngjesit të së enjtes, ku forcat e rendit kontrolluan një sërë adresash në Londrën Perëndimore. Gjatë kontrolleve, efektivët konfiskuan sasi të konsiderueshme substancash që dyshohet se janë kanabis dhe ketaminë, të cilat tashmë po i nënshtrohen analizave nga ekspertët. Në një minimarket lokal, policia së bashku me inspektorët e tregtisë kontrolluan çdo cep, përfshirë hapësirat mbi tavan, ndërsa grila metalike e biznesit u ça me forcë me pajisje elektrike për të zbuluar mallra të falsifikuara dhe lëndë narkotike. Në një banesë të vogël ku strehoheshin katër gra, u zbuluan armë të ftohta, përfshirë thika të tipit “zombie”, një sëpatë dhe një kosë e gjatë. Po ashtu, u kontrolluan banesa dhe një pub, ku u vunë sekuestro mbi automjete, një orë Rolex dhe sende të tjera luksoze. Vlera e pasurive të sekuestruara kap shifrën e rreth 200 mijë paundëve, krahas 30 mijë paundëve para të gatshme të kapura gjatë aksionit. Një nga bastisjet më të rëndësishme u krye në banesën e kreut të dyshuar të grupit, e cila nga oficerët cilësohej si “shtëpia miliona paundëshe”. Policia hyri pak para orës 05:00 të mëngjesit, duke thyer me mjet goditës derën e blinduar me shufra çeliku dhe duke u pajisur me mburoja elektrike për mbrojtje nga qentë e mundshëm brenda. Edhe pse i dyshuari kryesor nuk u gjet aty në momentin e parë, në banesë u arrestua bashkëshortja e tij, ndërsa më vonë autoritetet konfirmuan se vetë drejtuesi i dyshuar ishte kapur në një nga adresat e tjera ku po zhvilloheshin kontrollet. Një tjetër objektiv i kontrollit ishte edhe ambienti që dyshohet se shërbente si shtëpi publike në Hounslow, ku hetuesit gjetën katër gra dhe dy burra të akomoduar në dhoma të vogla. Kryeinspektori i policisë, Garth Hall, theksoi se fokusi i hetimit nuk ka qenë vetëm te trafiku i drogës, por edhe te dyshimet për shfrytëzim seksual dhe keqpërdorim të adresave të personave vulnerabël për fshehjen e parave dhe lëndëve narkotike. Sipas tij, grupi hetues po punon për të përcaktuar shkallën e përfshirjes së çdo individi dhe për të identifikuar personat që mund të jenë shfrytëzuar nga ky rrjet kriminal, duke shtuar se policia ka për obligim të ndërhyjë për çdo vepër penale dhe të mbrojë shtetasit në nevojë.