Këtë fundjavë kthejmë akrepat: Ja kur përfundon ora verore dhe çfarë duhet të dini

Këtë fundjavë, saktësisht gjatë natës mes së shtunës dhe së dielës, më 25 tetor, do të shënohet përfundimi i periudhës së orës verore. Në orën 03:00 pas mesnate, akrepat e orës do të zhvendosen një orë prapa, duke u kthyer në orën 02:00. Ky ndryshim do t'u mundësojë qytetarëve të shijojnë një orë më shumë gjumë gjatë kësaj nate. Pajisjet moderne, si telefonat inteligjentë, kompjuterët dhe mjetet e tjera digjitale të lidhura në rrjet, do ta kryejnë këtë përshtatje në mënyrë automatike. Megjithatë, orët analoge dhe ato tradicionale do të kenë nevojë për rregullim manual. Kujtojmë se në vitin 2018, Komisioni Evropian kishte dalë me një nismë për të hequr lëvizjen sezonale të orës. Edhe pse ky propozim mori mbështetjen e Parlamentit Evropian në vitin 2019, vendet anëtare nuk kanë arritur ende një konsensus përfundimtar për të përcaktuar nëse do të mbeten përgjithmonë me orën verore apo atë standarde. Sipas praktikës së deritanishme, ora verore hyn në fuqi të dielën e fundit të muajit mars dhe lë pas këtë cikël duke përfunduar të dielën e fundit të muajit tetor.