Avari në rrjetin e ujësjellësit në Drenas: Ashpërsohen reduktime e ujit në rrugën “Asllan Fazliu”

Një avari e ndodhur në rrjetin e ujësjellësit ka lënë pa furnizim të rregullt me ujë të pijshëm qytetarët që banojnë në rrugën “Asllan Fazliu” në Drenas. Shkak për këtë situatë është bërë plasja e një gypi të ujit në këtë pjesë të qytetit. Përmes një njoftimi zyrtar, Kompania Rajonale e Ujësjellësit “Prishtina” bëri me dije se derdhja e madhe e ujit po shkakton dëme në ambientet pranë shtëpive banuese. Si rrjedhojë, ndërmarrja është detyruar të aplikojë kufizime më të ashpra të furnizimit me ujë për këtë rrugë, në krahasim me lagjet e tjera. Sipas KRU “Prishtina”, ndërhyrja në terren për sanimin e prishjes do të nisë menjëherë pas marrjes së lejes përkatëse nga autoritetet komunale për prerjen e asfaltit. “Sanimi i defektit do të bëhet menjëherë posa të pajisemi me lejen për prerjen e asfaltit nga Komuna e Drenasit”, thuhet në njoftimin zyrtar të kompanisë. Në fund, kompania u ka bërë thirrje konsumatorëve të kësaj zone për mirëkuptim deri në riparimin e plotë të defektit dhe rikthimin e furnizimit normal me ujë të pijshëm.