Martesa me shtetasen ruse nuk e shpëtoi: Si u arrestua në Moskë elbasanlliu i kërkuar nga SPAK për drogë dhe miliona euro

Detaje të reja janë zbardhur nga operacioni ndërkombëtar që çoi në pranga në Federatën Ruse të shtetasit Salvatore, i njohur ndryshe edhe si Shpëtim Aliu. Interpol Moska ka vënë në dijeni Interpol Tiranën se ka ndaluar shqiptarin e shpallur në kërkim ndërkombëtar me “Pulë të Kuqe”, mbi të cilin rëndojnë akuzat e rënda për “trafik droge” dhe pjesëmarrje në “organizatë kriminale”. Sipas informacioneve paraprake, pas problemeve që i dolën me drejtësinë shqiptare në qershor të vitit 2026, Aliu u largua nga Dubai drejt kryeqytetit rus, Moskë. Lëvizja e tij u bë me shpresën se do t'i shpëtonte një arrestimi të mundshëm dhe ekstradimit të mëpasshëm në Shqipëri, një skenar i ngjashëm me raste të tjera të ngjashme nga Emiratet e Bashkuara Arabe. Për të siguruar strehim dhe për t'u kamofluar, Aliu ka shfrytëzuar lidhjet e tij sentimentale me një shtetase ruse, me të cilën edhe ishte martuar. Ai kishte planifikuar të jetonte i fshehur nën mbrojtjen dhe identitetin e bashkëshortes së tij në territorin rus. Megjithatë, pikërisht zbulimi i identitetit dhe vendndodhjes së bashkëshortes solli më pas edhe rënien në kurth të vetë Salvatore alias Shpëtim Aliut, i cili u kap në befasi nga strukturat e policisë ruse. Pas ndalimit të tij, Prokuroria e Posaçme (SPAK) ka ndërmarrë hapat zyrtarë duke dërguar një letërporosi përmes Ministrisë së Jashtme drejtuar autoriteteve të Federatës Ruse, me synimin e qartë të ekstradimit të tij drejt Shqipërisë. Aliu u vu zyrtarisht në kërkim nga SPAK në muajin qershor të këtij viti, pasi hetimet e deritanishme tregojnë se ai ka mbajtur një rol kyç në kuadër të një rrjeti ndërkombëtar të trafikut të kokainës. Dosja hetimore e ngritur nga SPAK zbulon se Salvatore Aliu dyshohet se ka pastruar në territorin shqiptar jo më pak se 30 milionë euro, të ardhura drejtpërdrejt nga aktivitetet e paligjshme kriminale. Në skemën e menaxhimit dhe qarkullimit të këtyre fondeve dyshuese, një rol kyç mësohet se ka luajtur vëllai i tij, Isa Aliu. Ky i fundit rezulton pronar i katër kompanive, të cilat, sipas hetimeve, janë përdorur për të kryer investime madhore në pasuri të paluajtshme, duke përfshirë vila, apartamente, troje dhe komplekse hoteliere në zona turistike të vendit. Në qershor të vitit 2026, Gjykata e Posaçme Kundër Korrupsionit dhe Krimit të Organizuar miratoi ndaj tij masën e sigurisë “Arrest në burg”, për veprat penale të “Trafikimit të narkotikëve”, “Pastrimit të produkteve të veprës penale ose veprimtarisë kriminale”, “Grupit të strukturuar kriminal” dhe “Kryerjes së veprave penale nga organizata kriminale dhe grupi i strukturuar kriminal”. Në kuadër të hetimeve, është zbuluar se Salvatore Aliu përdorte aplikacionin e enkriptuar SKY për komunikimet e tij, duke u identifikuar me nofka të ndryshme si “Dala”, “Qero”, “Qerosi”, “Viktor” dhe “Albo Pelon”. Në një përgjim të gushtit të vitit 2020, ai e njoftonte të vëllanë, Isa Aliu, se kishte menjëherë në dispozicion shumën prej 6 milionë eurosh. Vetëm dy javë më vonë, i njëjti person e porosiste se priste të siguronte edhe 20 milionë euro të tjera. Në komunikimet e zbardhura nga organet e akuzës, Aliu dyshohet se i jepte udhëzime operative vëllait të tij se si t'i fshihnin prerjet e mëdha të parave deri në momentin e përshtatshëm për t'i investuar, ku ndër idetë e çuditshme të sugjeruara ishte edhe vendosja e valutave brenda fuçive 50-litërshe dhe groposja e tyre në tokë.