Tragjedi në Gjermani: Përmbyset autobusi me turistë drejt festivalit të birrës, humbin jetën dy persona dhe plagosen 19 të tjerë

Një ngjarje e rëndë ka tronditur Gjermaninë, ku të paktën dy persona kanë ndërruar jetë dhe 19 të tjerë kanë kërkuar ndihmë mjekësore pasi një autobus turistik u përmbys pranë Mynihut. Automjeti transportonte rreth 35 udhëtarë, kryesisht shtetas me origjinë nga Filipinet, të cilët ishin nisur nga Milano me destinacion Mynihun për të marrë pjesë në festën tradicionale të birrës, Oktoberfest. Sipas informacioneve nga policia vendase, fatkeqësia rrugore u regjistrua rreth orës 05:41 të mëngjesit. Për shkaqe ende të paqarta, drejtuesi humbi kontrollin, duke bërë që autobusi të dilte nga korsia dhe të përmbysej në një hapësirë me shkurre në afërsi të Fürstenfeldbruck. Zëdhënësi i policisë, Martin Cornils, ka bërë të ditur se gjashtë nga të plagosurit janë transportuar me urgjencë përmes helikopterëve të shpëtimit, kurse pjesa tjetër është dërguar në spitalet më të afërta me anë të autoambulancave. Përveç dy viktimave, gjithsej 19 persona po marrin trajtim mjekësor, ndërkohë që grupet hetimore po punojnë intesivisht për të zbardhur rrethanat e plota të këtij incidenti. Deri në këto momente, autoritetet nuk kanë dhënë ende një shpjegim zyrtar se çfarë çoi në humbjen e kontrollit të mjetit. Kjo ngjarje vjen vetëm pak javë pas një tjetër tragjedie të ngjashme rrugore në kontinentin evropian, ku pesë persona gjetën vdekjen pas daljes nga rruga të një autobusi holandez në territorin e Zvicrës lindore.