Marrëveshja historike për Gazën: Bordi i Paqes vlerëson lart kontributin e Shqipërisë dhe Kosovës

Pas finalizimit të marrëveshjes së sotme mes Shqipërisë dhe Forcës Ndërkombëtare të Stabilizimit (ISF), ka ardhur një reagim zyrtar nga Bordi i Paqes. Ky institucion ka bërë të ditur se ky akord sjell mbështetje shtesë për operacionet e sigurisë dhe strukturat e planifikimit të misionit në Rripin e Gazës. Sipas njoftimit zyrtar, angazhimi i Shqipërisë i shtohet kontributeve ekzistuese të dhëna tashmë nga Kosova dhe Maroku. Këto ndihma po vlerësohen nga faktorët ndërkombëtarë si kyçe për forcimin e qeverisjes, garantimin e sigurisë, shpërndarjen e ndihmave humanitare, vendosjen e sundimit të ligjit dhe nxitjen e procesit të rindërtimit në Gaza. Në rrafshin zyrtar, Shqipëria ka formalizuar sot angazhimin e saj duke firmosur marrëveshjen me Bordin e Paqes për t'u bërë pjesë e Forcës Ndërkombëtare të Stabilizimit në këtë zonë të prekur nga konflikti. Ceremonia solemne e nënshkrimit të këtij dokumenti të rëndësishëm u organizua në mjediset e Shtabit të Përgjithshëm të Forcave të Armatosura të Republikës së Shqipërisë.