Komediania e njohur britanike ironizon Ed Sheeran gjatë debutimit në “SNL”

Komediania e njohur britanike, Amelia Dimoldenberg, ka shënuar një paraqitje të bujshme gjatë debutimit të saj në edicionin britanik të shfaqjes së famshme “SNL”, të mbajtur më 26 shtator. Gjatë këtij eventi, ajo nuk ka hezituar të drejtojë kritika të forta ndaj kantautorit të njohur Ed Sheeran, duke iu referuar polemikave të fundit me artistin Macklemore. Gjatë monologut hapës të mbrëmjes, drejtuesja e formatit të njohur “Chicken Shop Date” ndau me audiencën rrugëtimin e saj drejt kësaj skene prestigjioze dhe kujtoi disa nga personalitetet e njohura që ka pasur mundësinë t'i intervistojë deri më tani. Duke shprehur mirënjohjen për pozicionin e saj aktual, Dimoldenberg përmendi emra si Idris Elba dhe Cher, për të kaluar më pas te një krahasim thumbues. Ajo u shpreh se në listë ishte “edhe kukulla me flokë të kuqe, e njohur në gjithë botën, të së cilës dikush i fuste dorën në pjesën e prapme për t'i treguar fjalët që duhet të thoshte”. Në ekran u shfaq fillimisht një fotografi e personazhit të njohur Elmo, ndërsa komediania sqaroi menjëherë: “Jo, ai tjetri”, për të shfaqur më pas imazhin e Ed Sheeran, duke shkaktuar të qeshura në sallë. Kujtojmë se ylli i muzikës pop ka qenë në qendër të vëmendjes mediatike gjatë javëve të fundit, pasi reperi Macklemore bëri të ditur se ishte hequr nga lista e artistëve për turneun e tij. Shkak u bënë deklaratat e bëra nga Macklemore në mbështetje të palestinezëve gjatë një koncerti të mëparshëm. Macklemore bëri të publike se Robert Kraft, drejtor ekzekutiv i “Kraft Group” dhe pronar i stadiumit “Gillette”, kishte kontaktuar personalisht Sheeran për ta njoftuar se performanca e tij në atë stadium nuk do të lejohej. Nga ana e tij, Ed Sheeran zgjodhi të ruajë distancën, duke deklaruar se nuk dëshiron të përfshihet në debate publike lidhur me konfliktin në Gaza, ndërsa sqaroi se vendimi për largimin e Macklemore ishte marrë ekskluzivisht nga organizatorët.