Trump sinjalizon ndërhyrje të re ushtrake ndaj Iranit teksa afrohen zgjedhjet në SHBA

Gjatë ditës së premte, presidenti amerikan Donald Trump ka paralajmëruar se Uashingtoni mund të nisë një tjetër operacion ushtarak kundër Iranit. Ky zhvillim vjen në një kohë kur konflikti po hyn në muajin e tij të tetë, ndërsa shtrenjtimi i karburanteve po lë pasojat e veta në skenën politike, në prag të zgjedhjeve të mesit të mandatit në Shtetet e Bashkuara. Duke folur para mbështetësve të tij në një tubim në Florida, kreu i Shtëpisë së Bardhë u shpreh se ekziston mundësia e ndërmarrjes së një operacioni të ngjashëm me atë që e cilësoi si “një Furi Epike të vogël”. Megjithatë, Trump nuk ka preferuar të japë detaje shtesë lidhur me këtë deklaratë, sipas njoftimeve të agjencisë së lajmeve “Reuters”. Termi “Furia Epike” i referohet emërtimit që strukturat ushtarake amerikane i kanë vënë fushatës së deritanishme ushtarake kundër Iranit. Më herët gjatë së premtes, shefi i ekzekutivit amerikan sugjeroi se SHBA-ja ka kapacitetin ta mbyllë luftën brenda një periudhe të shkurtër kohore, por ngriti njëkohësisht dilema nëse Uashingtoni duhet të synojë një fund të shpejtë të konfliktit apo t'i lejojë zhvillimet të rrjedhin gradualisht drejt përfundimit të tyre. Gjatë gjithë kohëzgjatjes së luftës, presidenti i SHBA-ja ka dhënë shpeshherë qëllime dhe afate të ndryshme për epilogun e saj. Vetëm në fillim të këtij muaji, ai kishte deklaruar se Shtetet e Bashkuara nuk kishin në plan të ndërmerrnin sulme të reja ndaj Iranit para se të mbaheshin zgjedhjet për kontrollin e Kongresit amerikan. Ndërkohë, kampanja e sulmeve të përbashkëta mes Shteteve të Bashkuara dhe Izraelit kundër Iranit, e shoqëruar edhe me sulmet e Izraelit në Liban, ka lënë pas mijëra viktima në njerëz dhe ka detyruar miliona banorë të braktisin vatrat e tyre për shkak të dhunës.