Ministria e Shëndetësisë zbardh dosjen mjekësore: Si u trajtua pacientja me kancer para ndarjes nga jeta

Ministria e Shëndetësisë ka dalë me një sqarim zyrtar lidhur me rrethanat e trajtimit të pacientes që humbi betejën me kancerin. Durim Elshani, këshilltar për media i ministrit Arben Vitia, përmes një njoftimi të bërë publik, ka theksuar se sipas dokumentacionit mjekësor, e ndjera kishte marrë terapinë e përcaktuar nga specialistët, por se përparimi i sëmundjes kishte qenë i pashmangshëm pavarësisht ndërhyrjeve. Në reagimin e tij, Elshani u ka bërë thirrje mediave që të tregojnë ndjeshmëri ndaj dhimbjes së familjarëve dhe të përmbahen nga lidhja e shkakut të vdekjes me mungesën e terapisë, duke mos u bazuar në dokumente zyrtare mjekësore. Sipas të dhënave të prezantuara, pacientja ishte diagnostikuar me kancer gjiri gjashtë vite më parë, periudhë gjatë së cilës kishte përmbyllur me sukses cikle të kimioterapisë dhe radioterapisë. Megjithatë, në dhjetor të vitit 2025, sëmundja ishte rikthyer agresivisht me metastaza në kocka dhe në omentum. Pas shqyrtimit të rastit nga Konsiliumi i Klinikës së Onkologjisë, mjekët kishin rekomanduar mjekimin me medikamentet Palbociclib dhe Fulvestrant. Këshilltari për media ka bërë të ditur se furnizimi i pacientes me karanterin e terapisë kishte nisur në maj të vitit 2026, ndërsa procesi mjekësor kishte vijuar rregullisht gjatë muajve qershor, korrik dhe gusht. Pavarësisht mjekimit të vazhdueshëm, ekzaminimet klinike kishin dëshmuar përparim të sëmundjes, duke shfaqur metastaza të reja në tru dhe në boshtin kurrizor. Në fazën e avancuar, kur u konstatua se tumori kishte krijuar rezistencë ndaj terapisë fillestare, stafi mjekësor ndërmori ndryshimin e skemës kurative, duke përfshirë barna alternative dhe radioterapi paliative në tru, me qëllim menaxhimin e tumorit dhe lehtësimin e vuajtjeve të pacientes. Sipas raportit zyrtar, organizmi i pacientes nuk kishte arritur ta përballonte trajtimin në këtë stad kritik, çka solli edhe ndarjen e saj nga jeta. Elshani ka garantuar se çdo hap i trajtimit është i regjistruar në raportet zyrtare klinike. Dosja e plotë e pacientit mbetet e hapur për verifikim nga palët e autorizuara dhe institucionet kompetente në ambientet e Klinikës së Onkologjisë. Për shkak të respektimit të ligjeve në fuqi për mbrojtjen e të dhënave personale dhe konfidencialitetit, identiteti i pacientes nuk është bërë i ditur për opinionin e gjerë. Duke kërkuar mirëkuptim dhe duke i kërkuar ndjesë familjes për shqetësimin e krijuar nga raportimet e pasakta, institucioni ka përsëritur thirrjen që të respektohet kjo periudhë zie, duke u mbështetur vetëm te faktet e verifikueshme mjekësore.