Forcimi i bashkëpunimit: Mbahet takimi inaugurues i “Tryezës me partnerët socialë”

Ministri për Punë, Familje dhe Vlerat e Luftës Çlirimtare, Andin Hoti, ka udhëhequr takimin e parë të “Tryezës me partnerët socialë”, ngjarje në të cilën janë bërë publike të arriturat e derisotme të dikasterit që ai drejton, synimet për të ardhmen, si dhe prioritetet legjislative për periudhën 2026–2027. Gjatë bashkëbisedimit me krerët e sindikatave dhefaqësuesit e organizatave të punëdhënësve, në fokus kanë qenë tematikat që prekin marrëdhëniet e punës, sigurinë dhe mbrojtjen e të drejtave të punëmarrësve, si dhe stimulimi i punësimit. Me këtë rast, palët kanë shkëmbyer ide dhe sugjerime konkrete për të çuar përpara dialogun social. Në fjalën e tij, ministri Hoti ka vënë theksin te domosdoshmëria e përfshirjes së partnerëve socialë në proceset vendimmarrëse për hartimin e politikave dhe ligjeve të reja, duke kërkuar një konsultim dhe angazhim sa më aktiv nga ana e tyre. Po ashtu, në këtë takim është shqyrtuar edhe çështja e konstituimit dhe funksionalizimit të Këshillit Ekonomiko-Social, me qëllim kryesor ngritjen e nivelit të bashkëpunimit dhe konsensusit të ndërsjellë mes akterëve relevantë.