Agjenti 007 në horizont: Callum Turner dhe Jack Lowden mes favoritëve për të pasuar Daniel Craig

Kërkimi për të gjetur pasardhësin e Daniel Craig në rolin ikonik të James Bond-it duket se ka hyrë në aktin e tij final, duke ngritur entuziazmin e adhuruesve të sagës legjendare të spiunazhit në mbarë botën. Sipas burimeve ndërkombëtare, rrethi i pretendentëve është ngushtuar në vetëm tre emra, ku bëjnë pjesë Callum Turner dhe Jack Lowden, ndërkohë që identiteti i konkurrentit të tretë mbetet ende i mbështjellë me mister. Provat vendimtare para lentove të kamerave pritet të finalizohen gjatë këtij fundjavi, kurse shpallja zyrtare e fituesit mund të ndodhë shumë shpejt, brenda ditëve ose javëve në vijim. Nga ana tjetër, ylli i filmit "Saltburn", Jacob Elordi, mësohet se nuk do të jetë pjesë e kësaj faze të rëndësishme provash për rolin e agjentit 007. Callum Turner, 36 vjeç, është lakuar prej kohësh në qendër të spekulimeve si një nga favoritët kryesorë për të veshur kostumin e famshëm të Bond-it. Aktori, i cili është i martuar me yllin e muzikës pop Dua Lipa, ka spikatur me paraqitjet e tij në seritë "Fantastic Beasts" dhe prodhime të tjera kinematografike. Pavarësisht zërave, ende nuk ka një konfirmim zyrtar se ai e ka siguruar përfundimisht këtë angazhim. Përkrah tij, në garë fuqishëm renditet edhe Jack Lowden, i duartrokitur për performancën e tij në serialin e njohur "Slow Horses". Kolegu i tij i njohur, Gary Oldman, ka lënë të kuptohet se vendimi mund të jetë marrë tashmë, ndonëse mungon ende një vulë zyrtare nga prodhuesit. Edhe figura televizive Richard Osman ka pohuar se emri i Lowden i është komunikuar si një mundësi konkrete, duke i thurur eloga talentit të tij të spikatur në aktrim, elementin e humorit dhe skenat e aksionit. Kujtojmë se froni i James Bond-it i la boshe Daniel Craig pas shfaqjes së tij të fundit në filmin "No Time to Die", i cili u shfaq në kinema në vitin 2021. Prej asaj kohe, publiku dhe ndjekësit e serisë janë përfshirë në një pritje të gjatë për të zbuluar se cili do të jetë fytyra e re e agjentit sekret britanik. Deri në këto momente, asnjë vendim përfundimtar nuk është bërë i ditur zyrtarisht.