Argjendë Elshani, ushtarja e re e FSK-së: Potenciali në uniformë nuk pyet për gjini

Pjesë e 515 ushtarëve të rinj të Forcës së Sigurisë së Kosovës që kanë kurorëzuar sot betimin e tyre solemn ishte edhe Argjendë Elshani, e cila ka ndarë emocionet dhe sfidat e rrugëtimit intensiv të përgatitjes ushtarake. Gjatë rrëfimit të saj, ajo ka evokuar vështirësitë me të cilat janë ballafaquar gjatë fazës së trajnimit, duke veçuar angazhimin fizik dhe mendor që kërkon kjo detyrë. “Zgjimet pa zbardhur drita, marshimet sfiduese në terren, netët pa gjumë dhe testet e njëpasnjëshme, ato e sfilitin trupin tonë, por mbi të gjitha ngrenë lart vullnetin tonë. Historia jonë ushtarake ka dëshmuar se forca e një ushtari nuk matet nga gjinia, por nga gjakftohtësia, niveli i disiplinës dhe dashuria për vendin tonë”, u shpreh ajo. Në një ceremoni zyrtare të organizuar prani të udhëheqësve shtetërorë dhe autoriteteve ushtarake, 515 rekrutët e rinj zyrtarisht kanë mbyllur fazën përgatitore, duke nisur kështu një mision të ri në mbrojtje dhe shërbim të atdheut.