Chelsea mbetet pa Emi Martinezin, trajneri Alonso jep detajet për gjendjen e portierit dhe zëvendësimin e tij

Gjiganti londinez do t'i bëjë llogaritë pa shërbimet e portierit argjentinas Emi Martinez për një periudhë disa-javore. Lajmi është konfirmuar zyrtarisht nga numri një i stafit teknik të Chelseat, Xabi Alonso, i cili bëri të ditur se gardiani i,, është dashur t'i nënshtrohet një ndërhyrjeje kirurgjikale pas një frakture në nofull. Ky lëndim i rëndë erdhi gjatë triumfit 2-0 të bluve ndaj Evertonit të zhvilluar fundjavën e kaluar, pas një dyluftimi të fortë me mbrojtësin Jarrad Branthwaite, incident ky që kërkoi dërgimin e menjëhershëm të portierit në spital për ndërhyrje mjekësore. “Ai është më mirë tani. Ai iu nënshtrua operacionit. Ende duhet të presim. Do të mungojë për disa javë. Shpresojmë që të jenë më pak sesa më shumë”, u shpreh strategu spanjoll gjatë konferencës për shtyp. Përballja e së shtunës në Premierligë kundër Tottenham Hotspur pritet të sjellë në formacionin bazë Mike Penders, i cili do të mbrojë portën e Chelseat në mungesë të Martinezit. Tekniku spanjoll ka shprehur besim të plotë te portieri i ri, duke vlerësuar punën e palodhur të tij në seancat stërvitore dhe paraqitjet solide në takimet e kupës. “Ai është gati. Ka stërvitur mirë dhe ka luajtur disa ndeshje të kupës, ku ka treguar nivel të mirë. Edhe kur u inkuadrua ndaj Evertonit, në ato pak minuta tregoi personalitetin dhe cilësitë e tij”, shtoi ai. Krahas situatës së portierit, Alonso ka dhënë përditësime edhe rreth statusit fizik të Malo Gustos dhe Pep Chavarrias, të cilët nuk u paraqitën në sfidën e shkuar për shkak shqetësimesh fizike. Sipas konfirmimit të trajnerit, Gusto ka lënë pas dëmtimin dhe është plotësisht i gatshëm për lojë, kurse Chavarria po vijon procesin e rikuperimit në seanca stërvitore, por ende nuk do të rrezikohet për derbin e kësaj fundjave. Dueli mes Chelseat dhe Tottenham Hotspur do të zhvillohet këtë të shtunë në stadiumin e londinezëve, ku skuadra vendase synon vazhdimësinë e serisë së rezultateve pozitive në elitën e futbollit anglez.