Skenderaj bëhet me unazë të brendshme, Lushtaku zbulon detajet e projektit infrastrukturor

Infrastruktura rrugore në qytetin e Skenderajt ka hyrë në një fazë të re zhvillimi, pasi kanë nisur zyrtarisht punimet për ndërtimin e unazës së brendshme. Ky projekt strategjik synon të lidhë rrugën “28 Nëntori” me atë “Fadil Rrustemi”, duke krijuar një arterie të rëndësishme qarkullimi në dalje te Parku “Idriz Rrecaj”. Këtë zhvillim e ka bërë të ditur i pari i komunës, Sami Lushtaku, i cili ka vënë në pah ndikimin e drejtpërdrejtë që do të ketë ky investim në lehtësimin e lëvizshmërisë dhe modernizimin e rrjetit rrugor urban. Sipas kreut të komunës, ky aks i ri është jetik për shkak të efekteve pozitive në shkarkimin e trafikut të ngarkuar, zgjidhjen e problemit të qasjes dhe krijimin e një rrjeti më funksional që lidh zonat e ndryshme të qytetit. “Ky është një segment me rëndësi të veçantë për qarkullimin në qytet, i cili do të ndikojë në lehtësimin e trafikut, përmirësimin e qasjes dhe krijimin e një lidhje më funksionale ndërmjet pjesëve të qytetit”, ka deklaruar Lushtaku. Duke folur për rëndësinë e kësaj nisme, ai ka përmendur se ky projekt përkon me angazhimet e vazhdueshme për të ngritur cilësinë e shërbimeve dhe mirëqenien e banorëve të kësaj zone. “Punimet që po nisin sot janë një tjetër hap konkret drejt përmirësimit të infrastrukturës rrugore dhe standardit të jetës për qytetarët e Skenderajt!”, ka përfunduar Lushtaku.