Trazirat në Tiranë/ Merren masa ndaj forcave rendit, AMP heton dhjetëra denoncime nga qytetarët

Gjatë një takimi të zhvilluar në qytetin e Korçës, ku në qendër të vëmendjes ishte lufta kundër trafikut të fëmijëve, zëvendësministrja e Brendshme, Silva Caka, ka bërë një pasqyrë të sjelljes së efektivëve të policisë gjatë tubimeve të fundit në kryeqytet. Ajo pranoi hapur se krahas ndërhyrjeve korrekte apo rasteve të pasivitetit, janë konstatuar edhe situata ku uniformat blu kanë shkelur kufijtë e lejuar të përgjegjësisë, duke sjellë si masë paraprake pezullimin e shtatë punonjësve të policisë të cilët tashmë po kalojnë në sitën e hetimeve të Agjencisë së Mbikëqyrjes Policore. “Janë aktualisht 7 efektivë të pezulluar nga vetë Policia e Shtetit, të cilët i janë shtruar hetimit nga Agjencia e Mbikëqyrjes Policore. Gjithashtu këta janë referuar nga Policia e Shtetit, kemi 4 të hetuar kryesisht nga vetë AMP-ja dhe janë edhe 55 ankesa të paktën deri në këto momente që flasim, janë 55 ankesa nga qytetarë të ndryshëm të cilët kanë sinjalizuar tejkalimin e detyrës nga policë të ndryshëm. Të gjitha ankesat do të shqyrtohen dhe do të kthehet një përgjigje”, theksoi zëvendësministrja Caka. Më tej, ajo ka ngritur shqetësimin për përfshirjen e mundshme të të miturve dhe të rinjve në skenarë të rrezikshëm protestash, duke paralajmëruar se pasojat mund të përkthehen në ndëshkime të rënda ligjore për ta, për shkak të ndikimit nga persona keqdashës. “Është shumë e rëndësishme që të rinjtë dhe fëmijët që po marrin pjesë në këtë protestë të njihen me individë të cilët nuk janë aty për t’i ndihmuar që të çojnë përpara mesazhet e tyre, por janë aty për t’u mësuar edhe atyre se si duhet të sillen në një”, u shpreh ajo.