Kërcënoi me thikë dhe grabiti të miturin në Tiranë, bie në pranga 25-vjeçari

Uniformat blu të kryeqytetit kanë vënë në pranga një 25-vjeçar, i cili dyshohet se është autori i një grabitjeje me dhunë të ndodhur në rrugën “Hoxha Tasim”, ku viktimë ka rënë një 17-vjeçar. Sipas njoftimit zyrtar, i mituri ishte paraqitur në polici për të denoncuar ngjarjen, duke shpjeguar se një person i panjohur, pasi e kishte kanosur me thikë, i kishte grabitur portofolin dhe i kishte shkaktuar plagë të lehta trupore. Falë veprimeve të shpejta hetimore, blutë e Tiranës kanë arritur të zbardhin ngjarjen, duke identifikuar dhe arrestuar të dyshuarin me inicialet F. M., 25 vjeç, mbi të cilin rëndon akuza për veprën penale “Vjedhja me dhunë”. Gjatë operacionit për kontrollin e banesës së të dyshuarit, situata ka eskaluar, pasi babai dhe motra e tij dyshohet se janë bërë pengesë për efektivët, duke kundërshtuar me forcë veprimet e tyre zyrtare. Si pasojë e kësaj ngjarjeje, autoritetet kanë nisur procedimin penal në gjendje të lirë ndaj dy familjarëve të 25-vjeçarit, për veprat penale “Pengimi i zbulimit të së vërtetës” dhe “Kundërshtimi i punonjësit të policisë së rendit publik”. Ndërkohë, policia ka sqaruar se ndërhyrja në ambientet e kësaj banese është kryer në kuadër të zbardhjes së plotë të grabitjes, pas qarkullimit në rrjetet sociale të një videoje ku pretendohej se forcat e rendit kishin ndërhyrë gjatë orëve të natës.