Alarmi te Arsenal: Arteta flet për gjendjen e rënduar të Bukayo Sakës para duelit me Evertonin

Kryetrajneri i Arsenalit, Mikel Arteta, ka ndarë detaje shqetësuese rreth gjendjes fizike të anësorit Bukayo Saka, i cili rrezikon seriozisht të mos paraqitet në sfidën e fundjavës kundër Evertonit në kuadër të Premierligës. Reprezentuesi anglez u detyrua të braktisë fushën e blertë pas vetëm 10 minutave lojë në takimin e zhvilluar të mërkurën mbrëma në Ligën e Kampionëve përballë Bayern Munichut. Saka ndjeu një shqetësim të fortë në zonën e kofshës pas një pasimi në distancë dhe sinjalizoi menjëherë stafin mjekësor të klubit londinez. Edhe pas ndërhyrjes së parë ndihmëse, ai e pati të pamundur të vazhdonte lojën, duke ia lënë vendin në fushë Eberechi Eze. Menjëherë pas ndeshjes, strategu spanjoll nuk e fshehu brengosjen e tij për dëmtimin e lojtarit kyç, duke pranuar se pamjet e para nuk ishin aspak premtuese. “Jemi pak të shqetësuar. Kur një lojtar detyrohet të largohet nga fusha për shkak të dhimbjeve të forta, kjo nuk është kurrë një shenjë e mirë. Megjithatë, duhet të presim dhe të shohim”, kishte deklaruar Arteta. Gjatë konferencës për shtyp të zhvilluar të premten, tekniku i “Topçinjve” sqaroi se stafi mjekësor ende nuk ka një diagnozë përfundimtare për shkallën e lëndimit dhe se lojtari do t'i nënshtrohet testeve shtesë. “Ai do t’i nënshtrohet një rezonance tjetër magnetike këtë pasdite, pasi kishte mjaft lëng në zonën e prekur dhe ishte e vështirë të kuptohej shkalla e lëndimit. Na nevojiten edhe disa ekzaminime dhe mendime nga specialistët”, u shpreh Arteta. Shtimi i vështirësive në lëvizje dhe pamundësia për të ecur pa dhimbje e detyrojnë klubin të veprojë me shumë kujdes, ndërkohë që pritet verdikti përfundimtar nga mjekët. Tani mbetet të shihet nëse Saka do të arrijë të rikuperohet në kohë për sfidën ndaj Evertonit, apo nëse ky dëmtim do ta mbajë atë jashtë fushave të gjelbra për një periudhë më të gjatë kohore.