Vëllazërim historik në Prishtinë: Tifo-grupet shqiptare lënë pas rivalitetet dhe bashkohen për mbrojtjen e UÇK-së

Në një tubim masiv të organizuar sot në kryeqytet, skena e tifo-grupeve në Kosovë ka dhënë një shembull të fuqishëm uniteti, duke u mbledhur në mbrojtje të vlerave të Ushtrisë Çlirimtare të Kosovës dhe ish-krerëve të saj. Tubimi ka nisur në zonën prapa Pallatit të Rinisë dhe Sporteve, prej nga marshuesit janë nisur drejt sheshit “Skënderbeu”, hapësirë kjo që tash e disa ditë shërben si pikë tubimi për protestuesit. Mbi kokat e pjesëmarrësve është valëvitur pankarta me mesazhin e fuqishëm: “UÇK ndeohet kur shqiptaria bashkohet”, ndërkohë që në këtë thirrje kombëtare nuk kanë marrë pjesë vetëm “Arpagjik’t” e Prizrenit dhe “Intelektualët” e Gjilanit. Manifestimi ka zgjatur rreth 30 minuta, kohë gjatë së cilës organizatorët i janë drejtuar masës me një fjalim ku u theksua se bashkimi i gjithë këtyre mbështetësve ka vetëm një emër të përbashkët: UÇK. Atmosfera është mbizotëruar nga këngë patriotike, thirrje kundër tradhtarëve dhe ndezja e mjeteve piroteknike, të njohura si “pyro”, të cilat kanë kulmuar energjinë e të pranishmëve. Veçantia më e madhe e kësaj dite ka qenë kapërcimi i rivaliteteve tradicionale mes tifozërive, duke sjellë në një krah mbështetës të skuadrave si Plisat, Torcida, Forca dhe UCF, të cilët zakonisht ndajnë fërkime të ashpra mes vete. Të gjitha këto grupe kanë lënë anash mosmarrëveshjet dhe inatet sportive, duke i dhënë përparësi kauzës së përbashkët kundër dënimit të ish-udhëheqësve të UÇK-së.