Demaku flet para sfidës me Austrinë: Atmosferë fantastike në Vjenë, synojmë rezultat pozitiv

Mesfushori i Përfaqësueses së Kosovës, Vesel Demaku, ka ndarë emocionet dhe pritshmëritë e tij në prag të ndeshjes së rëndësishme që "Dardanët" do të zhvillojnë kundër Austrisë, duke theksuar se mbështetja nga bashkatdhetarët në Vjenë është e jashtëzakonshme. Gjatë një prononcimi për media, Demaku vlerësoi lart atmosferën e krijuar në kryeqytetin austriak, ndërsa u shpreh optimist se skuadra e tij është e përgatitur për të dhënë më të mirën në fushën e gjelbër dhe për të arritur një paraqitje dinjitoze. "Kemi gjetur një atmosferë shumë të mirë, ku shumë shqiptarë kanë udhëtuar për të na qëndruar pranë dhe për të na dhënë mbështetje. Shpresojmë të zhvillojmë një ndeshje cilësore dhe të dalim me një rezultat pozitiv", u shpreh ai. Duke analizuar kundërshtarin, futbollisti i Kosovës e cilësoi Austrinë si një kundërshtar tejet të fortë që luan me ritëm të lartë, por shtoi se stafi teknik ka bërë analizën e duhur për të përcaktuar pikat kyçe ku duhet treguar kujdes maksimal gjatë duelit.