Krizë e hapur te Manchester United: Përplasje verbale mes Carrick dhe sulmuesit në zhveshtore pas debaklit evropian

Atmosfera te Manchester United ka arritur në pikën e vlimit. Gjatë humbjes së rëndë 4:1 kundër Comos në kuadër të xhiros së tretë të Ligës së Kampionëve, trajneri Michael Carrick dhe sulmuesi brazilian Matheus Cunha janë përfshirë në një konflikt të hapur verbal, i cili dyshohet se ka shpërthyer në fushë dhe ka vazhduar më pas edhe brenda dhomave të zhveshjes. Sipas raportimeve nga terreni, pakënaqësitë nisën qysh në pjesën e parë, kur Carrick mbeti tejet i zhgënjyer nga paraqitja e sulmuesit të tij. Një incident gjatë një ndërprerjeje të lojës, pas një topi të humbur nga “Djajtë e Kuq”, u vu re edhe nga gazetari Samuel Luckhurst, i cili konfirmoi shkëmbimin e ashpër të fjalëve mes dyshes. Situata u përshkallëzua në pushim të ndeshjes, kur trajneri vendosi ta zëvendësonte brazilianin, vendim ky që e nxori nga vetja Cunhan, i cili nuk e fshehu aspak mllefin para syve të bashkëlojtarëve. Tensioni në kampin anglez mbeti i lartë edhe pas përfundimit të takimit. Gjatë pjesës së parë, Cunha e nisi ndeshjen në krahun e majtë, por kontributi i tij mbeti i kufizuar me vetëm 27 prekje topa dhe një gjuajtje drejt portës. Në përpjekje për të ndryshuar rrjedhën e lojës në disavantazh 1:0, Carrick hodhi në fushë Amad Diallon në vend të Cunhas dhe Carlos Baleban në vend të Andrej Santosit. Megjithatë, lëvizjet taktike dështuan, pasi vendasit e Comos realizuan edhe tre herë të tjera në fraksionin e dytë, duke vulosur një triumf të thellë. Ky dështim e zhyt Manchester Unitedin edhe më thellë në krizë, duke shënuar shtatë ndeshje radhazi pa shijuar fitoren. Me vetëm dy triumfe nga 11 paraqitje këtë edicion, presioni mbi Michael Carrick është rritur në përmasa alarmante, sidomos pas deklaratave kritike të kapitenit Bruno Fernandes, i cili hapur lëshoi vërejtje për strategjinë e stafit teknik dhe mungesën e presionit ndaj kundërshtarit. Nga ana e tij, trajneri u arsyetua se skuadra provoi të ndryshonte qasje në pjesën e dytë, por dështimet në prapavijë sollën ndëshkimin me gola. Pavarësisht situatës tejet kritike, burimet bëjnë me dije se Carrick do të jetë në krye të skuadrës për duel-kampional të së dielës kundër Bournemouthit. Megjithatë, bordi drejtues i klubit po shqyrton seriozisht fatin e tij, teksa emra të njohur si Eddie Howe, Antonio Conte dhe Julian Nagelsmann po lundrojnë si pasardhës të mundshëm. Brenda klubit mbizotërojnë dy qasje: një fraksion kërkon t'i jepet edhe pak kohë trajnerit aktual, ndërsa krahu tjetër kërkon ndryshim urgjent për shkak të rënies drastike të rezultateve dhe mungesës së angazhimit nga ana e futbollistëve.