Deputeti i AAK-së, Besnik Tahiri: Procedimi i ligjit për Gjykatën Speciale në Kuvend dëmtoi kauzën tonë kombëtare

Deputeti i Aleancës për Ardhmërinë e Kosovës, Besnik Tahiri, ka adresuar kritika të ashpra lidhur me rikthimin e projektligjit për Dhomat e Specializuara në Kuvend, duke e vlerësuar këtë hap si një goditje të rëndë për vlerat e luftës çlirimtare. Tahiri ka bërë të ditur se ky zhvillim është i patolerueshëm për partinë e tij, teksa ka shprehur befasinë ndaj qasjes së ekzekutivit, i cili sipas tij ka heshtur për dy javë me radhë ndërkohë që dokumenti ka qenë në shqyrtim qeveritar. “Rikthimin e ligjit në Kuvend, si Aleancë, e kemi parë si një veprim jashtëzakonisht të dëmshëm dhe jo serioz, i cili në esencë për ne e ka dëmtuar kauzën. Për më shumë, jemi të habitur se si Qeveria po lëshon lot krokodili, gjoja se u gjet një gabim, derisa dy javë e ka pasur në Qeveri dhe s’ka dhënë asnjë koment”, është shprehur ai. Sipas ligjvënësit opozitar, AAK-ja nuk do të lejojë në asnjë mënyrë cenimin e historisë së lavdishme të luftës për liri, duke shtuar se në Hagë po mbrohet e vërteta e popullit dhe jo agjendat e subjekteve politike. “Për Aleancën është akt i papranueshëm dhe do të shohim si do të rrjedhë. Për ne, në Hagë mbrohet tregimi për liri, nuk mbrohen partitë, mbrohet e vërteta jonë. Nuk do ta lejojmë dëmtimin e kauzës së luftës për liri”, ka shtuar ai. Në fund, Tahiri ka bërë të ditur se opozita ende nuk është e njohur me përmbajtjen e ndryshimeve të paralajmëruara, pasi ende nuk e kanë shqyrtuar dokumentin zyrtar të dërguar nga ana e presidentes.