Kryeministri Rama: Protestat e dhunshme në Tiranë u kurdisën prej muajsh, pas tyre qëndron krimi dhe financimet e huaja

Kryeministri i vendit, Edi Rama, ka hedhur akuza të rënda lidhur me trazirat e fundit në kryeqytet, duke deklaruar se përshkallëzimi i dhunës nuk ka qenë spontan, por i planifikuar prej disa muajsh. Gjatë një daljeje publike për të sqaruar ngjarjet e ndodhura, ai theksoi se strukturat e rendit zotërojnë prova konkrete për skenarin e dhunës, përfshirë futjen e maskave dhe lëndëve plasëse në territorin shqiptar, si dhe përfshirjen e grupeve të mirëorganizuara. Kreu i ekzekutivit vuri theksin te dallimi i qartë mes të drejtës legjitime për të protestuar dhe akteve të dhunshme, të cilat i cilësoi si krime të papranueshme. Sipas tij, protestat e paraqitura fillimisht me simbolet e flamingove kishin kauza të drejta, por ato u manipuluan dhe u ndikuan që në nisje nga faktorë të jashtëm, duke u shndërruar më pas në një valë të dytë dhune që u glorifikua padrejtësisht nga disa media. Duke analizuar bilancin e efektivëve të lënduar krahasuar me protestuesit, Rama bëri një paralelizëm me praktikat evropiane, duke njoftuar se në Tiranë raporti ka qenë dy policë të plagosur për çdo protestues të dëmtuar. Më tej, ai konfirmoi se Policia e Shtetit ka dokumentuar aktivitetin e elementëve që veprojnë nën logon e rrjetit Antifa, të cilët sipas tij përdorin metoda të anarkisë dhe komunizmit urban, ndërsa i gjithë ky operacion është mbështetur financiarisht nga krimi i organizuar dhe aktorë të huaj. “Jam këtu për të ndarë me ju një nga komponentët e asaj që ndodhi në ditët e terrorit psikologjik mbi kryeqytetin dhe mbi popullin e Shqipërisë, komponentë që po zbërthehen dhe po çmontohen hap pas hapi. Ndërkohë që liria për të protestuar është një e drejtë e padiskutueshme e çdo qytetari në Shqipëri, dhuna është një krim i parelativizueshëm dhe i pajustifikueshëm. Për fat të keq në protestat e javës së fundit u bënë bashkë që të dyja, nga një anë liria për të protestuar si një e drejtë e pahomueshme dhe nga ana tjetër dhuna si një krim që u relativizua, por u glorifikua në ekranet e korruptuar të mbrëmjeve mediatike. Pa pushim e pa pushim, orë e çast, Shqipëria dhe shqiptarët panë me ankth se si terrori mori peng që të gjithë dhe u mbingarkuan me idenë tërësisht të rreme se studentë të pafajshëm, studentë idealistë, studentë të dalë në rrugë për të çliruar Shqipërinë u vunë nën dhunën policore. Një përmbysje dramatike, manipuluese e një realiteti tërësisht tjetër. Kam ndarë me ju raportet e protestuesve të plagosur dhe policëve të lënduar në Evropë dhe në Shqipëri, në vendet ku ka ndodhur diçka e ngjashme dhe në Tiranë, ku fatkeqësisht ka pasur dy punonjës policie të plagosur për një protestues të lënduar, ndërkohë që në vende të tjera raporti është i përmbysur, me shifra dhe fakte përtej asaj që u tregua në ekranet e korruptuara. Sot jam këtu për të ekspozuar një komponent që e kam komentuar mes shumë përqeshjeve dhe mes shumë ofendimeve të kthyera drejt meje si një koment fyes për studentët. Qysh se nisi protesta paqësore masive e flamingove kam thënë se arsyet janë legjitime. Arsyet mund të jenë dhe të pafundme, por se qysh në krye të herës ajo protestë ishte e influencuar rëndë nga forca të tjera ka qenë një fakt. Ka qenë një fakt që në këtë valë të dytë dhe të dhunshme është evidentuar në të gjithë përmasën e vet. Përshkallëzimi është përgatitur për disa muaj. Të dhënat e futjes në Shqipëri të maskave, të lëndëve eksplozive e kështu me radhë përmes doganës dhe nga subjekte të caktuara janë tanimë në dorën e policisë. Të dhënat e organizimit të grupeve si pjesë e rrjetit Antifa, rrjetit të terrorit urban që në emër të komunizmit, anarkisë dhe antikapitalizmit ka vendosur të futet në jetën e njerëzve përmes dhunës janë në duart e Policisë së Shtetit, por në duart e Policisë së Shtetit janë edhe dëshmi të tjera të rëndësishme që lidhen drejtpërdrejt me financimet e tyre.”