Akuzat e forta të Ramës: Protestuesit e dhunshëm nuk janë studentë, u financuan nga krimi dhe qarqe të huaja

Kryeministri Edi Rama ka hedhur akuza të rënda ndaj Partisë Demokratike, duke e identifikuar atë si nxitësen kryesore të akteve të dhunës të shënuara pranë Ministrisë së Arsimit gjatë tubimeve të studentëve. Gjatë një prononcimi publik, kreu i ekzekutivit e ka etiketuar opozitën si “glasa mbi tortë”, ndërkohë që ka ngritur dyshime se individët e përfshirë në përleshjet me efektivët e rendit janë mbështetur financiarisht nga struktura të krimit të organizuar dhe aktorë të huaj. Sipas shefit të qeverisë, Partia Demokratike ka pranuar autorësinë e incidenteve të dhunshme në afërsi të dikasterit të arsimit, ndërsa ka paralajmëruar publikimin e sekuencave filmike që, sipas tij, do të tronditin opinionin e gjerë. Rama këmbënguli se personat që shfaqen në këto pamje nuk kanë asnjë lidhje me kauzën e studentëve apo me protestën e tyre paqësore. Ai sqaroi se identiteti i tyre është fshehur përkohësisht në zbatim të ligjit, duke theksuar se bëhet fjalë për persona të ndaluar nga strukturat e rendit. Duke vijuar më tej me pretendimet e tij, kryeministri deklaroi se protagonistët e dhunës janë shpërblyer nga grupet kriminale ndërkombëtare dhe të brendshme, me qëllim destabilizimin e vendit dhe përmbysjen e rendit kushtetues. Megjithatë, në këtë dalje publike nuk janë bërë publike emra specifikë apo dëshmi dokumentare që konfirmojnë këto akuza. “Forca e ardhur nga jashtë, qershia mbi tortë, ose më saktë glasa mbi tortë, është PD. Dje PD mori autorësinë e fillimit të dhunës te Ministria e Arsimit. Do të ndaj me ju pamje që do të trondisin më shumë se ju shumëkënd. Për arsye se është ruajtur identiteti i personave në respekt të ligjit. Të gjithë personat që do të shihni janë subjekt dhe objekt i sulmeve. Janë persona të ndaluar nga policia. Nuk janë studentë, janë diçka tjetër. Nuk i përkasin dhe nuk kanë asnjë lidhje me ata studentë që nuk i janë bashkuar kësaj dallge terrori urban, por që qëndrojnë në atë protestë paqësore, të lidhur me jetën e tyre të përditshme. Duan të më imponojnë mua që të shkel kontratën me shqiptarët. Çdo koment është i tepërt nga ana ime. Mjaftojnë çehret, pavarësisht fshehjes së identitetit, që mund të jenë pjesë e një përfaqësie të një bote të zymtë, karrierat e këtyre individëve, që janë paguar nga krimi i organizuar dhe forca të huaja. Duan ta kthejnë përmbys edhe një herë rendin. Këta nuk janë studentët. Tani është koha që fjalia të mbështetet nga faktet dhe dokumentet”, u shpreh Rama.