Goditet rrjeti i shpërndarjes së kokainës në Burrel: Vihen në pranga tre persona, sekuestrohen drogë, armë dhe sende me vlerë

Një operacion i mirëorganizuar policor i koduar “Start 3” ka çuar në arrestimin e tre personave në qytetin e Burrelit, të cilët dyshohet se bashkëpunonin për gatimin dhe tregtimin e lëndëve narkotike. Aksioni u finalizua me sukses falë bashkëpunimit mes strukturave vendore të Dibrës dhe Komisariatit të Policisë Mat. Në prangat e policisë kanë rënë shtetasit A. M., 27 vjeç, dhe D. Gj., 55 vjeç, të dy me banim në Sanxhak të Laçit, si dhe 72-vjeçari N. Gj., banues në Burrel. Sipas informacioneve zyrtare, ky operacion vjen pas një hetimi disaditor të udhëhequr me metoda proaktive nga Prokuroria e Dibrës, ndërsa ekzekutimi u krye nga specialistët e Seksionit për Hetimin e Narkotikëve pranë DVP Dibër, në bashkëngjitje me forcat e Komisariatit të Matit. Gjatë kontrolleve të ushtruara si në trup ashtu edhe në ambientet e banimit të të dyshuarve, shërbimet e policisë zbuluan dhe bllokuan në cilësinë e provës materiale 94.70 gramë substancë të dyshuar narkotike kokainë, 19 fishekë luftarakë të kalibrave të ndryshëm, 13 aparate celulare, dy peshore elektronike që shërbenin për ndarjen e doza, një automjet dhe një orë dore luksoze të markës “Rolex”. Në bazë të hetimeve paraprake, autoritetet bëjnë me dije se të dyshuarit kishin ndërtuar një skemë bashkëpunimi, ku siguronin, përgatisnin dhe më pas shpërndanin doza kokaine në lokacione të ndryshme brenda territorit të Burrelit. Të gjitha materialet procedurale i kanë kaluar për kompetencë Prokurorisë pranë Gjykatës së Shkallës së Parë të Juridiksionit të Përgjithshëm Dibër, për ndjekjen e mëtejshme të veprave penale.