Jenna Ortega shpjegon pse i shmang filmat e saj: Rrezikoj psikozën

Aktorja e mirënjohur Jenna Ortega ka ndarë me publikun një qasje mjaft të veçantë ndaj karrierës së saj, duke pranuar se refuzon kategorikisht të shohë projektet ku ajo luan apo të lexojë vlerësimet e kritikëve të filmit. Për 24-vjeçaren, ky vendim nuk është thjesht një preferencë, por një masë mbrojtëse për shëndetin e saj mendor. Gjatë një rrëfimi për revistën prestigjioze “Vogue”, Ortega shpjegoi se ekspozimi ndaj komenteve dhe analizave mbi aktrimin e saj do ta çonte atë drejt një gjendjeje të rënduar psikologjike, të cilën ajo e përshkroi si “një lloj psikoze”. Aktorja theksoi se përpiqet të ruajë një distancë të shëndetshme mes jetës private dhe personazhit publik, duke shmangur kështu ndikimin e mendimeve të të tjerëve. Një tjetër aspekt që Ortega zgjedh ta injorojë janë raportet financiare mbi suksesin e filmave të saj. Ajo ka treguar se nuk i hap dokumentet që ekipi i saj i dërgon mbi shitjen e biletave, pasi dëshiron të shmangë shndërrimin e artit të saj në thjesht një tregues shifrash. Informacionet për suksesin e projekteve të saj ajo i merr vetëm në mënyrë sporadike, përmes njerëzve të afërt ose përmes rrjeteve sociale, ndonëse kohën e kaluar në internet po e redukton ndjeshëm. Aktorja nuk e fshehu shqetësimin për ndikimin e teknologjisë moderne, duke kritikuar veçanërisht përmbajtjen e krijuar nga inteligjenca artificiale, të cilën ajo e cilësoi si “mbeturina”. Sipas saj, shoqëria sot e vëzhgon veten përtej limitit të shëndetshëm, gjë që shton presionin mbi individin. Aktualisht, Jenna Ortega është e përqendruar në promovimin e filmit të saj më të ri, “Klara and the Sun”. Ky angazhim e ka çuar atë në një tur intensiv nëpër metropolet kryesore botërore, nga Londra në Romë e deri në Nju Jork. Megjithatë, pavarësisht famës ndërkombëtare, ajo mbetet e vendosur për të ruajtur kufijtë e saj, duke mos lejuar që perceptimi publik të diktojë mënyrën se si ajo e vlerëson punën dhe personalitetin e saj.