Vala e shtrenjtimit godet shportën e konsumatorit: Vezët arrijnë në 4 euro, qytetarët kërkojnë ndërhyrje

Kostoja e jetesës në Kosovë po përballet me sfida të vazhdueshme për shkak të rritjes së çmimeve të produkteve bazë ushqimore, gjë që po ndikon drejtpërdrejt në buxhetin e familjeve kosovare. Së fundmi, vëmendja është fokusuar te çmimi i vezëve, i cili ka shënuar ngritje, duke u tregtuar tani nga 3.70 deri në 4 euro për një paketim me 30 copë, nga 3.50 euro sa kushtonte vetëm dy muaj më parë. Opinionet e qytetarëve rreth kësaj dukurie janë të ndara. Derisa një pjesë e konsumatorëve e konsiderojnë këtë çmim si të pranueshëm duke marrë parasysh vlerat ushqyese të produktit, të tjerët shprehin shqetësim të thellë për shkak të pagave të ulëta dhe kërkojnë masa për zbutjen e kësaj barre financiare. Qytetari Ragip Rugova mendon se çmimi aktual nuk është i lartë, duke e argumentuar këtë me përfitimet ushqyese dhe ekonominë që ofron ky artikull. “Një pako me 30 vezë i bie rreth 13 centë për kokë. Me 50 centë mund të përgatisësh një shujtë të shëndetshme dhe të bollshme. Për ata që kanë mundësi, nuk mendoj se është shtrenjtë”, shprehet ai. Megjithatë, Rugova thekson se zgjidhja afatgjate për çmimet e larta qëndron te fuqizimi i prodhimit vendor. Sipas tij, meqenëse shumica e produkteve vijnë nga importi, ato janë të ndjeshme ndaj çmimeve të energjisë dhe faktorëve të jashtëm. Ai shton se stimulimi i prodhimit tonë është rruga e vetme për një stabilitet më të mirë ekonomik. Në anën tjetër, Shemsi Berisha, i cili kishte zgjedhur të blinte vezë fshati me çmim prej 5 euro e 25 centë për 20 copë, pranon se kjo kosto është mjaft e lartë për pjesën dërrmuese të popullsisë. “Për mua nuk përbën problem, por për shumë qytetarë të tjerë me mundësi të kufizuara, ky çmim është vërtet i kushtueshëm”, deklaroi ai. Sfidën e përballimit të këtyre çmimeve e ka theksuar edhe qytetarja Arife Ramadani. Ajo i ka cilësuar çmimet në Prishtinë si tejet të larta, duke kërkuar reagim institucional për t'i përshtatur ato me pagat aktuale, të cilat nuk po arrijnë t'i mbulojnë shpenzimet e domosdoshme mujore.