Teherani ashpërson qëndrimin: S’ka hapje të Ngushticës së Hormuzit dhe as negociata pa garanci të reja

Irani ka bërë të ditur se Ngushtica e Hormuzit do të mbetet e mbyllur dhe se nuk do të ketë kthim në tryezën e bisedimeve me Shtetet e Bashkuara pa u përmbushur shtatë kushte specifike, të cilat janë përcjellë tashmë përmes kanaleve diplomatike. Mohsen Rezaei, sekretar i Këshillit Suprem të Sigurisë Kombëtare të Iranit, ka bërë të qartë se Teherani nuk ka më ndërmend të mbështetet në premtime që bazohen vetëm në mirëbesim. Në një deklaratë të përcjellë nga agjencia ISNA, Rezaei nënvizoi se ndonëse Irani nuk po heq dorë përfundimisht nga diplomacia, ai nuk do t’i rikthehet mënyrave të vjetra të ndërveprimit. Ai shtoi se përderisa vendi preferon uljen e tensioneve, çdo zgjatje e mëtejshme e konfliktit vetëm sa do ta forcojë pozicionin e Teheranit, pavarësisht se ky nuk është skenari i dëshiruar. Zyrtari iranian paralajmëroi gjithashtu se në rast të përshkallëzimit të konfliktit, Irani është i gatshëm të aktivizojë kapacitete të reja luftarake për të goditur asetet amerikane në rajon. Ndër objektivat e mundshme, ai përmendi infrastrukturën e inteligjencës artificiale dhe kabllot strategjike. Megjithatë, Rezaei nuk e fshehu realitetin ekonomik, duke pranuar se një bllokadë e zgjatur sjell vështirësi të mëdha për ekonominë iraniane dhe se çdo pretendim i kundërt do të ishte jorealist. Në kuadër të operacioneve të tij, Rezaei pretendoi se gjatë tre muajve të fundit, forcat iraniane kanë goditur çdo natë nga pesë anije që, sipas tij, përdoreshin nga kontrabandistët. Kujtojmë se përplasja mes Iranit, SHBA-së dhe Izraelit mori përmasa të mëdha më 28 shkurt, pas sulmeve të ndërmarra nga Uashingtoni dhe Tel Avivi kundër Teheranit. Irani u kundërpërgjigj me sulme me dronë dhe raketa, duke e shndërruar Ngushticën e Hormuzit, një arterie vitale për energjinë globale, në epiqendrën e krizës. Përpjekjet diplomatike për paqe, përfshirë memorandumin e qershorit, kanë dështuar deri më tani për shkak të mosmarrëveshjeve të thella rreth lundrimit në këtë zonë strategjike.