Diaspora shqiptare në Texas ngrihet në protestë për mbrojtjen e vlerave të UÇK-së dhe vendimin e Speciales

Diaspora shqiptare në Texas është organizuar për të mbajtur një protestë paqësore këtë të hënë, duke filluar nga ora 13:00 me orën lokale, në qytetin e Austin. Kjo tubim vjen si një reagim i hapur kundër vendimit të fundit të Dhomave të Specializuara të Kosovës ndaj figurave kryesore të Ushtrisë Çlirimtare të Kosovës. Grupi i shqiptarëve në Texas njihet si një ndër bashkësitë më dinamike dhe më aktive në Shtetet e Bashkuara të Amerikës, i cili shquhet për kontributin dhe pjesëmarrjen e tij të vazhdueshme në sferën publike, kulturore dhe sociale të këtij shteti amerikan. Sipas organizatorëve, qëllimi kryesor i kësaj proteste është kundërshtimi i verdiktit të gjykatës nga ana e diasporës shqiptare në SHBA, si dhe ngritja e zërit për të lartësuar misionin e pastër të UÇK-së në mbrojtje të popullit dhe për arritjen e lirisë së Kosovës. Në një zhvillim të mëparshëm, vetëm dy ditë përpara shpalljes së aktgjykimit, më 14 shtator, kongresisti amerikan nga Texas, Keith Self, kishte shprehur hapur shqetësimet e tij mbi mundësinë e ndërhyrjes së ndonjë “anshmërie politike” në proceset vendimmarrëse të tribunalit të Hagës. "Shpresoj që një anshmëri e tillë të mos shfaqet këtë javë, kur të merret vendimi në gjykimin ndaj Hashim Thaçit dhe tre civilëve shqiptarë që luftuan për pavarësi pas viteve të shtypjes serbe", kishte shkruar kongresisti Self përmes një postimi në platformën sociale X. Tubimi do të zhvillohet në qytetin e Austin, ku bashkatdhetarët tanë do të bashkohen për të përcjellë një mesazh të fuqishëm solidarizimi me luftën e drejtë të UÇK-së dhe drejtuesit e saj historikë.