Tragjedia në diskotekën “Pulse”: Dëshmitarët rrëfejnë veprimet e policisë natën e zjarrit

Gjatë seancës gjyqësore për 13 ish-efektivët e policisë, të cilët akuzohen se nuk zbatuan planin e veprimit në rastin e tragjedisë në diskotekën “Pulse”, dëshmitarët e thirrur nga mbrojtja kanë dëshmuar lidhur me angazhimin e forcave të rendit para dhe pas rënies së zjarrit. Njëri nga dëshmitarët tregoi se si, në cilësinë e të miturit, ishte larguar nga lokali për shkak të një aksioni policor pak çaste para se të shpërthente flakët. Ndërkohë, dëshmitari i dytë përmendi ndihmën e dhënë nga efektivët në evakuimin e të lënduarve dhe pastrimin e hapësirës, ndërsa një i tretë shtoi se policët dhanë udhëzime konkrete se ku duhet të dërgoheshin të mbijetuarit. I pyetur në sallën e gjyqit, dëshmitari i parë – i mitur në kohën e ngjarjes – kujtoi se kishte mbërritur në diskotekë rreth orës 01:15 të mëngjesit dhe se bashku me shoqërinë e tij vendosën të largoheshin pasi morën njoftimin për praninë e policisë jashtë. "Kamerieri erdhi dhe na tha se kishte policë jashtë", shpjegoi ai, duke shtuar se në atë moment ndodheshin tashmë pranë derës dalëse. Ai detajoi se u ndalua në hyrje nga një efektiv policie, i cili u regjistroi të dhënat personale, kohë në të cilën u dëgjua thirrja alarmante nga brenda për zjarr. "Dikush nga brenda bërtiti se kishte rënë zjarr dhe oficeri i policisë na tha të largoheshim me vrap nga vendi", u shpreh dëshmitari. I pyetur nga trupi gjykues, ai identifikoi të pandehurin Marjan Radevski si efektivin që i kishte legjitimuar atë natë. Dëshmitari konfirmoi se shkaku i largimit të tyre ishte mosha e mitur dhe frika nga prania e policisë, duke pranuar se do të kishin qëndruar brenda nëse forcat e rendit nuk do të kishin qenë aty. Në anën tjetër, dëshmitari i dytë tregoi se natën kritike kishte qëndruar fillimisht në kafenenë “Bulevar” dhe rreth orës 02:00 ishte nisur me miqtë drejt diskotekës “Pulse”. Duke përshkruar skenën para hyrjes, ai vuri në dukje praninë e personave të lënduar në tokë dhe tregoi se si kishte bashkëpunuar me efektivët për t'i larguar ata dhe për të zhbllokuar hyrjen. "Marjani na kërkoi të lironim hyrjen nga shkallët", theksoi ai, duke shtuar se kishte ndihmuar në zhvendosjen e disa prej të dëmtuarve në një vend të sigurt.