Operacion masiv anti-kontrabandë në veri: 10 të arrestuar, mbi 20 automjete të sekuestruara dhe mallra mbi 200 mijë euro

Një operacion i gjerë policor i zhvilluar të enjten në 22 lokacione të ndryshme në katër komunat veriore të vendit ka rezultuar me arrestimin e dhjetë personave dhe konfiskimin e mbi 20 automjeteve. Autoritetet vlerësojnë se vlera e mallrave të dyshuara për kontrabandë kalon shifrën e 200 mijë eurove. Zëvendësdrejtori i Policisë së Kosovës për rajonin e veriut, Veton Elshani, ka bërë të ditur se ky aksion është kurorëzim i një hetimi gjashtëmujor, i cili është udhëhequr nga Policia e Kosovës në bashkëpunim të ngushtë me Agjencinë Kosovare të Inteligjencës (AKI). Ky operacion është realizuar në koordinim me Doganën e Kosovës dhe Administratën Tatimore, nën mbikëqyrjen e drejtpërdrejtë të Prokurorisë Themelore në Mitrovicë. “Në fakt ky hetim ka nisur para gjashtë muajve, pas informatave të cilat i ka mbledhur Policia e Kosovës bashkë me Agjencinë Kosovare të Inteligjencës. Mandej kemi shkuar te prokurori i Prokurorisë Themelore në Mitrovicë, kemi diskutuar me të, i njëjti ka urdhëruar marrjen e veprimeve për zhvillim të hetimeve dhe ne kemi filluar punën në prill të këtij viti”, ka deklaruar Elshani. Pas muajve të tërë të grumbullimit të provave, autoritetet kanë ndërmarrë bastisje në 22 pika të ndryshme të rajonit verior. Kontrollet policore janë shtrirë në nëntë lokacione në Mitrovicën e Veriut, nga pesë në Zveçan dhe Zubin Potok, si dhe në tri lokacione të tjera në komunën e Leposaviqit. Elshani ka konfirmuar se dhjetë persona janë shoqëruar në stacionin policor si të dyshuar kryesorë, ndërsa hapat e mëtejmë ligjorë ndaj tyre do të përcaktohen nga prokurori pas përfundimit të intervistimit. “Deri tani ne kemi sjellë në stacion 10 persona të cilët konsiderohen të arrestuar, si të dyshuar lidhur me rastin në fjalë. Mandej pas intervistimit do të vendoset nga prokurori se si të veprohet tutje”, ka theksuar ai. Për shkak të sasisë së madhe të mallrave të paligjshme të zbuluara, kontrollet dhe verifikimet në teren kanë vazhduar për disa orë. Krahas mallrave, me urdhër të prokurorisë janë sekuestruar mbi 20 mjete transporti, duke përfshirë vetura civile, automjete terreni (xhipa) dhe dy kamionë. Sipas përllogaritjeve preliminare, vlera e mallrave të kontrabanduara kap shifrën mbi 200 mijë euro. “Konsiderojmë që vlera e përgjithshme është diku mbi 200 mijë euro. Sidoqoftë, ne kemi mbi 20 mjete motorike, duke filluar prej veturave, xhipa, dy kamionë janë, që janë konfiskuar me urdhër të prokurorit dhe mandej do të vendoset se si të veprohet tutje”, ka shtuar Elshani. Në mesin e mallrave të konfiskuara figurojnë produkte tekstili, barna farmaceutike, artikuj ushqimorë dhe mallra të llojeve të ndryshme. Sipas hetimeve paraprake, ekzistojnë dyshime të forta për ekzistencën e një skeme të mirëfilltë të transportit të mallrave nga Serbia. Elshani ka shpjeguar se mallrat dyshohet se futeshin nga Serbia përmes pikës kufitare të Bërnjakut në drejtim të Mitrovicës, ku më pas pajiseshin me dokumentacion fals që dëshmonte kinse blerjen e tyre në këtë qytet, për t'u dërguar më pas në tregun e Prishtinës. “Janë të gjitha kategoritë e mallrave. Prej tekstilit, barna, gjëra ushqimore dhe gjëra të tjera. Kemi fenomen për shembull, nëse e shihni nëpër video, e shihni një kamion aty i cili vjen prej Serbisë, hyn nëpër urën e Bërnjakut që është mbi pikën kufitare të Bërnjakut, vazhdon rrugën, vjen këtu tek Mitrovica, merr dokumentacionet që janë këtu, domethënë dyshimet janë qartë të orientuara në këtë drejtim”, ka përfunduar ai.